Qostanaı oblysynda asyl tuqymdy reprodýktordyń qurylysy bastaldy
Jıynda aýyl sharýashylyǵy salasynyń jumysy qorytyndylandy. Oblys ákiminiń birinshi orynbasary Ǵaýez Nurmuhametovtiń aıtýynsha, sońǵy jyldary óńirde tórt túliktiń sany ósken. Óndiristik sektor nyǵaıyp, oblys boıynsha 1359 aýyl sharýashylyǵy kásiporny mal ósiredi.
«Otyz úsh sharýashylyq sút óndirýmen aınalysady. Sonyń 10 shaqtysy iri sút-taýar fermasyna jatady. Máselen, bıyl Fedorov aýdanynda ashylǵan «Búrkit» JShS-de kúnine júz sıyr saýylady. Jyl sońyna deıin Jitiqara aýdanynyń «Shadenov» sharýa qojalyǵynda 80 basqa arnalǵan taǵy bir sút-taýar fermasy ashylatyn boldy. Qostanaı aýdanynyń «Aqqudyq» JShS-de sút-taýar fermasyn 140 basqa arttyrý josparlanǵan. Etti baǵyttaǵy mal sharýashylyǵyn damytý úshin oblysta bir mezgilde 26 myń malǵa arnalǵan birinshi deńgeıdegi mamandandyrylǵan bordaqylaý alańdarynyń jelisi quryldy.Arqalyq qalasynda bes myń iri qaraǵa arnalǵan birinshi deńgeıdegi bordaqylaý alańynyń jáne 2,5 myń basqa arnalǵan asyl tuqymdy reprodýktordyń qurylysy bastaldy. Nysan kelesi jyly paıdalanýǵa beriledi», - deıdi oblys ákiminiń orynbasary.
Qostanaı oblysynda et óńdeý kólemi men eksporttyq áleýetti arttyrý maqsatynda keshendi sharalar qolǵa alynǵan. Qostanaı qalasynda «Bıf Eksport Grýpp» JShS jylyna 20 myń tonna et óńdeý zaýytyn salmaq. Jobanyń quny 5,7 mlrd teńge. Óndiris orny ashylǵanda 184 adam jumyspen qamtylady. Jańa kásiporyn jyldyń sońyna deıin paıdalanýǵa berilmek. Bul et ónimderin qaıta óńdeýdi 30% arttyrady.
Oblys ákimi Arhımed Muhambetov bıyl aýyl sharýashylyǵy salasyndaǵy kórsetkishterge rıza ekenin aıtty. Alaıda munymen toqtap qalýǵa bolmaıdy, alda kúrdeli kezeń kútip tur. Tıisinshe, sala mamandary men sharýalarǵa qoıylar mindet te joǵary.
«Ósirilgen ónimniń kólemi oblystyń azyq-túlik qaýipsizdigin qamtamasyz etý, sondaı-aq syrtqy naryqtarǵa ótkizý úshin jetkilikti. Oblystyń mal sharýashylyǵy men qaıta óńdeý salasynda jańa ınvestıtsııalyq jobalardy iske asyrý jáne iske qosý jalǵasýda, qosylǵan quny bar taýarlar shyǵarýdy odan ári ulǵaıtý, onyń ishinde astyqty tereń óńdeý boıynsha óndirister ashý boıynsha jumys júrgizilýde. Jaqyn arada óndiristi odan ári jańǵyrtý, kásiporyndardyń básekege qabilettiligin, oblystyń jalpy eksporttyq áleýetin arttyrý mindetteri tur», – dedi Arhımed Muhambetov.
Qostanaı óńiri elde un óndirý jóninen birinshi, sút boıynsha ekinshi, sary maı, ıogýrt, jarma, makaron ónimderin óndirý boıynsha úshinshi oryn alady. Bul kórsetkish agroónerkásiptik keshenniń eksporttyq áleýetin artta túskenin kórsetedi. Bıyl 247 mln AQSh dollarynan astam aýylsharýashylyq ónimderi eksportqa shyǵarylǵan.
