Qostanaı oblysynda Armenııadan ákelingen 438 kólik tirkeldi

QOSTANAI. QazAqparat — Qostanaı oblysyna Armenııadan 763 kólik ákelingen. Búginde sonyń 438-i tirkeldi, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.

Armenııadan ákelingen oń jaq róldi kólikterdiń 70-i qaıta jabdyqtalǵan, ıaǵnı róli sol jaǵyna aýystyryldy. Máselen, kólik ıesi Muhamedjan Álimǵazın aýyldan Qostanaı qalasyna arnaıy kelip, kóligin tirkeýge qoıdy. Buǵan deıin ol alystaǵy sharýashylyqta egin jınaý naýqanynda bolǵan.

«Sol sebepti kóligimdi esepke qoıýǵa yńǵaıly ýaqyt bolmady.

«Alfard« kóligin Armenııadan ákeldim, áýelde esepke qoıý máselesi sheshilmegesin aqyryn kúttim. Keıin jeńildetilgen júıe boıynsha tirkeýge qoıýǵa bel býdym. Budan soń dala jumystary bastaldy. Demalys kúni HQKO jumys istegeni yńǵaıly boldy, búgin avtokólikti tirkeýge qoıdym», - deıdi ol.

Qazir armıan kólikterdiń bar oblys turǵyndary aı saıyn ótkiziletin «Jolda qabyldaý» aktsııasyn asyǵa kútedi. Olar polıtsııaǵa suraqtaryn ınternet jelisi arqyly qoıýǵa daǵdylanǵan. Búgingi qabyldaýda 20-dan astam suraq qoıyldy.

«Jolda qabyldaý» aktsııasyn ákimshilik polıtsııa bastyǵy Andreı Grıgorevskıı jáne jergilikti polıtsııa bastyǵynyń mindetin atqarýshy Jeńis Bısembaev ótkizdi.

Aktsııanyń alǵashqy eki saǵatynda armıan nómirlerimen úsh avtokólik esepke alyndy, olardyń biri — qaıta jabdyqtalǵan mashına.

Oblysta Armenııadan ákelingen 438 mashına jáne 70 qaıta jabdyqtalǵan mashına tirkeldi.