Qostanaı oblysynda Armenııadan ákelingen 135 kólik tirkeldi
QOSTANAI. QazAqparat – Qostanaı oblysynda Armenııadan ákelingen avtokólik quraldaryn tirkeý jumystary qarqyndy júrip jatyr. Búginde óńirde 130-dan astam avtokólik tirkelgen, dep habarlaıdy QazAqparat.
Aıta keteıik, Úkimet qaýlysyna sáıkes 2020 jyldyń 1 maýsymynan 1 qyrkúıegine deıin Armenııa Respýblıkasynan ákelingen kólik quraldaryn tirkeý jumystary júrgizilýde.
Qostanaı oblysy Polıtsııa departamenti Ákimshilik polıtsııa basqarmasynyń bastyǵy Andreı Grıgorevskııdiń aıtýynsha, jyl basynan beri aımaqqa Armenııadan 763 avtokólik jetkizilgen.
«Armenııadan ákelingen kólikterdiń basym bóligi Qostanaı, Rýdnyı, Lısakov qalalaryna, sondaı-aq Qostanaı jáne Áýlıekól aýdandaryna tıesili. Búgingi tańda avtokólik ıelerimen júrgizilgen jumystardyń nátıjesinde 135 mashına tirkeldi. Mamandandyrylǵan HQO-da tirkelý protsesi nebári 15-20 mınýt ýaqytty alady. Kólik quraldarynyń ıeleri tek úsh tólem jasaýy kerek: tirkeý úshin alym, tehnıkalyq pasport úshin baj jáne memlekettik tirkeý nómirlik belgisi úshin baj salyǵy. Osylaısha, ýaqytsha esepke alý úshin tólem somasy 11 946 teńgeni quraıdy», - dep atap ótti Andreı Grıgorevskıı.
Tehnıkalyq pasport jáne Armenııanyń memlekettik nómirlik belgisi onyń ıesi talap etkenge deıin HQO-da saqtalady. ıAǵnı kez kelgen ýaqytta kólik ıesi, eger ony satqysy kelse nemese elden shyǵarǵysy kelse, jańa nómirdi qaıtaryp, burynǵysyn ala alady.
Eger atalǵan kólik quraldary 2020 jyldyń 1 qyrkúıegine deıin tıisti tirkeýden ótpese, kólik ıesine qatysty ákimshilik kodekstiń 590-babymen shara qoldanylady.
