Qostanaı oblysynda analogtyq habar taratý toqtatylady
Osy jazda Qostanaı óńiri analogtyq teledıdardan tolyǵymen ajyratylady. Bul týraly Qostanaı oblystyq teleradıo habarlaryn taratý dırektsııasynyń Bas ınjeneri Anatolıı Tıýtıýnnık habarlady.
«2019 jyly Almaty, Pavlodar jáne Qostanaı oblysy tsıfrlyq efırlik habar taratýǵa tolyq ótedi dep josparlanyp otyr. Al, 2020 jyldyń sońyna deıin Shyǵys Qazaqstan, Soltústik Qazaqstan, Qaraǵandy, Atyraý, Qyzylorda oblysynda analogty habar taratý toqtatylady. Endi shalǵaı aýyldardyń turǵyndary teledıdardy eń joǵary sapada tegin kóre alady. Soǵan baılanysty halyq arasynda aqparat-nasıhattyq jumystar júrgizý qajet. Qostanaı oblysynda analogty telehabar taratýdy ajyratý jáne tsıfrlyq habardy sátti qosý maqsatynda 59 radıo-televızııalyq stansa salyndy. Bul oblys turǵyndarynyń 98%-in tsıfrlyq teleradıo habarlaryn taratýmen qamtýǵa múmkindik beredi», - dedi Anatolıı Tıýtıýnnık.
Onyń aıtýynsha, Qostanaı oblysynda 627 eldi meken bar. Barlyǵy 49 aýylǵa tehnıkalyq múmkindikterge baılanysty sapaly habar taratylmaıdy. Olar arnaıy sıgnal qabyldaý aımaǵyna kirmeıdi.
«Osylaısha, 2 myńǵa jýyq úı sharýashylyǵynyń sandyq efırlik telehabar taratý júıesine qosylý múmkindigi joq. Degenmen olar OTAU TV ulttyq operatorynyń jerseriktik teledıdaryna qosyla alady. Qazir oblysta mundaı 50 myń abonent bar», - deıdi ol.
Búginde oblystyq jáne aýdandyq ákimdikter ataýly áleýmettik kómek alatyn barlyq otbasylardy sapaly habar taratý júıesimen qamtamasyz etý úshin qajetti sharalar qabyldaýda. Óńirimizde 687 az qamtylǵan nemese kópbalaly otbasyǵa sandyq habar taratý resıveri tegin beriledi.