Qostanaı oblysynda alyp qoılar ósirilmek
QOSTANAI. QazAqparat - Qostanaı oblysynda «Bastaý Bıznes» jobasy qarqyndy júzege asýda, dep habarlaıdy QazAqparat.
Oblysta «Bastaý Bıznes» jobasy boıynsha ótinim bergen 779 adamnyń 180-i qazirdiń ózinde kásibin qolǵa aldy. Bıznes-strategııalar iri qara ósirýdi, qoı men eshki baptaýdy, sút óndirisin qurýdy jáne bordaqylaý alańdaryn salýdy kózdeıdi. Al Qostanaı oblysy aýyl sharýashylyǵy basqarmasy bularǵa erekshe nazar aýdaryp otyr. «Atameken» kásipkerler palatasynyń sarapshysy Robert ıÝsýpovtiń aıtýynsha, qurylys materıaldarynyń óndirisi, júk tasymaly sııaqty basqa da aýqymdy jobalar bar.
Komıssııa músheleriniń nazary jas kásipker Qaırat Áýbákirovtiń jobasyna birden túsken.
Kásipker Áýlıekól aýdanynda asyl tuqymdy dorper qoılaryn ınnovatsııalyq jolmen kóbeıtip, taratýdy qolǵa almaqshy. Ol úshin "Atameken" mıkroqarjy uıymynan 2,5 mln teńge nesıe alýǵa nıetti. «Bastaý Bıznes» jobasynyń qatysýshysy qazirdiń ózinde jaıylymdyq alqaptardy taýyp qoıǵan.
«Avstralııanyń dorper tuqymdy qoılary etti keledi. Ol eki-úsh kún sý ishpeı júre beredi. Terisine qurt jolamaıdy, júni ózi túsip qalady. Qoıdyń salmaǵy - 140 keli. Aptap ystyqta da, otyz gradýstyq aıazda da shydamdy túlik shópti kóp jemeıdi. Sharýaǵa keregi osy. Eger meniń jobam qabyldansa, dorper tuqymdy 20-30 bas qoıdy satyp alamyn», - dedi Qaırat Áýbákirov.
