Qostanaı oblysynda alıment tóleýden qashqan 119 ákeniń múlki tárkilendi
Qostanaı oblysynda alıment tólemegen boryshkerlerdiń bereshegi 99 mln teńgeden asyp ketken. Búginde alımentterdi óndirip alý týraly azamattyq-atqarýshylyq isterdiń 398-i jeke sot oryndaýshylaryna jiberildi. Alımentten jaltarǵan taǵy 3 ákeniń isimen memlekettik sot oryndaýshylary jumys istep jatyr.
«Oblys boıynsha aǵymdaǵy jyldyń eki aıynda 42 adam ákimshilik jaýapqa tartyldy. Olardyń isi QR Ákimshilik quqyq buzýshylyq kodeksiniń 669 babymen qaraldy. Zańǵa sáıkes kámeletke tolmaǵan balalarǵa tólenetin alımentter kólemin sot oryndaýshysy jalaqy men ózge de kiristerdi negizge ala otyryp aıqyndaıdy. Eger adam osy kezeńde jumys istemese, onda onyń alıment tóleý somasy Qazaqstan Respýblıkasyndaǵy ortasha aılyq jalaqy mólsherine negizdeledi», - deıdi oblystyq ádilet departamenti basshysynyń orynbasary Dınara Sársebekova.
Qostanaı oblysynda 429 adam alıment tóleýden bas tartqan. Keıbireýiniń qaryzy 3 mıllıon teńgege jetken. Sot oryndaýshylary balaǵa tıesili qarajatty qaıtarý úshin ákimshilik isterdi kóbeıtpek. Jalpy Qostanaıda 96 jeke,17 memlekettik sot oryndaýshy jumys isteıdi. Olar polıtseılermen birlese otyryp túrli reıdtik-sharalar ótkizip jtyr.
Aıta keteıik, «Neke (erli-zaıyptylyq) jáne otbasy týraly» Qazaqstan Respýblıkasynyń kodeksiniń Zańnyń 125-babynda atqarýshylyq qujatty oryndamaǵany úshin boryshker ákimshilik ne qylmystyq jaýapkershilikke tartylýy múmkin ekendigi jazylǵan.
2020 jyly jeke sot oryndaýshylary 167 boryshkerdi ákimshilik jaýapqa tartty, nátıjesinde 119 ákeniń múlki tárkilengen.
