Qostanaı oblysynda alıment tólemegen ákeler qoǵamdyq jumystarǵa tartylady
QOSTANAI. QazAqparat – Qostanaı oblysynda alıment qaryzyn tóleýden jaltarǵandar májbúrli qoǵamdyq jumystarǵa tartylady, dep habarlaıdy QazAqparat tilshisi oblystyq sottyń baspasóz qyzmetine silteme jasap.
Byltyr oblys sottary alıment óndirýge qatysty 2 myń 298 isti qaraǵan. Búginde olardyń sany kóbeımese, azaıǵan joq. Sýdıalar alıment tóleýge mindetteý sheshiminiń oryndalýy qıyn ekenin aıtady. Boryshkerler kóbine ótinishti elemeı, tabystaryn jasyrýǵa tyrysady.
«Jumyssyz otyrǵandar da alıment tóleıdi. Eger boryshker jumys istemese, oǵan Qazaqstandaǵy ortasha eńbekaqy boıynsha esepteledi. Qazir ortasha aılyq kólemi 200 myń teńge shamasynda. Boryshkerdiń bir balasy bolsa, aıyna osy somanyń tórtten birin aýdaryp otyrýy kerek. Oblysta alımentten bas tartqandardyń deni tabysyn jasyrady. Olarmen kúres jalǵasady. Sonyń biri – májbúrli qoǵamdyq jumystarǵa tartý», - deıdi oblystyq mamandandyrylǵan aýdanaralyq sotynyń resmı ókili Qarlyǵash Sálimjanqyzy Sharmuhametova
Oblysta 500-deı áke alıment qaryzyn tólemeı júr. Olardyń qaryzy 300 mln teńgege jetip qalǵan. Jaqynda oblystyq mamandandyrylǵan aýdanaralyq sotynda resýrstyq ortalyq ashylmaq. Onda kásibı zańgerler alıment qaryzyn tólemeı nemese óteı almaı júrgen ata-analarǵa tegin keńes beredi.
