Qostanaı oblysynda alıment tólemegen 13 ákeniń kóligi tárkilendi

QOSTANAI. QazAqparat – Qostanaı oblysy Sot oryndaýshylary óńirlik palatasy alıment tólemeı júrgendermen kúresti kúsheıtti, dep habarlaıdy QazAqparat tilshisi.

Sot oryndaýshylary jyl sońyna deıin bereshek somasyn barynsha azaıtýdy kózdep otyr. Óıtkeni alıment tólemegenderdiń qaryzy 93 mln teńgege jetken.

«Qasaqana alıment tólemeı júrgendermen belsendi kúreske barlyq óńirler boıynsha prokýratýra qyzmetkerlerin de qosamyz. Qazirgi statıstıka nashar, 9 aıdyń qorytyndysy boıynsha 14,5 myń atqarýshylyq is túsken. Alıment óndirý máselesi ońaı emes, sondyqtan biz osy baǵyttaǵy jumysty kúsheıtýdi jón kórdik jáne jaqyn arada boryshkerler úshin reıd bastaımyz. Sondaı-aq boryshkerlerge balalar aldyndaǵy óz mindettemelerin erikti túrde óteýge múmkindik bere otyryp, olardy jumysqa ornalastyrýǵa tyrysamyz. Bizde mundaı tájirıbe, jaqsy nátıjeler bar. Jazalamas buryn, biz osy jaǵdaıda sheshim tabýǵa tyrysamyz. Biraq, eger boryshkerler ymyraǵa kelgisi kelmese, onda biz zań boıynsha talapkerdiń paıdasyna jyljymaly jáne jyljymaıtyn múlikti májbúrlep alyp qoıýǵa kóshemiz», - deıdi Jeke sot oryndaýshylary óńirlik palatasy basshysynyń orynbasary Esimgeldi Shodorov.

Jyl basynan beri tek oblys ortalyǵynda ǵana alıment tólemegen 13 ákeniń avtokólikteri tutqyndalyp, tárkilengen.