Qostanaı oblysynda Ahmet Baıtursynuly týyp-ósken úıdiń irgetasy qaıda ketti

QOSTANAI. QazAqparat - Bıyl 150 jyldyǵyn atap ótetin Ahmet Baıtursynulynyń kindik qany tamǵan úıiniń izi de qalmaǵan. Buǵan deıin irgetasy turǵan. Ahańnyń kózindeı sol berik irgetasty merdigerler buzyp tastap, ornyn tez úgitiletin taspen órgen, dep habarlaıdy QazAqparat Habar 24 arnasyna silteme jasap.

Onyń ózinde qııýyn keltirmeı, jurttyń ashýyn týǵyzǵan edi. Bul áreket jalpaq jurtqa áıgi boldy.

– Mynaý arada Ahmettiń burynǵy úıiniń izi bolǵan. Fýndamenti bunyń qara shymnan kesekten salynǵan edi. Mine, qarap otyrsańdar jobasy osy jerden. Mynaý arada peshpen bólingen edi. Sol peshpen bólingen buryshta bizdiń Ahmet atamyzdyń úıindegi ájemiz osy jerde Ahmet atamyzdy dúnıege ákeldi-aý dep ózimiz oılaıtyn edik. Astan-kesteńi shyqqan. Іzi de qalmaǵan, dymy da qalmaǵan. Eń sońǵy Ahmettiń ózimizde bar eskertkishinen aıyrylyp qalyp turmyz, - deıdi Ahmet Baıtursynuly aýylynyń turǵyny Jaqsybek Ábdisalyq.

Jermen-jeksen bolǵan aýmaqta byltyr eki bólmeli úı turǵan. Ult ustazy Sarytúbektegi osy baspanada dúnıege keldi deıdi jurt.

Ony eskertkish retinde turǵyndar 2009 jyly bastapqy keıpindegi irgetastyń ústinen salǵan.

Aımaq taǵy bir kıeli nysannan aıyryldy. Týra bir aı buryn Ahmet Baıtursynuly týǵan úı tolyq buzyldy.

Bıyl Alash arysynyń 150 jyldyq mereıtoıynda maqtan tutarlyq eshqandaı eskertkish qalmaǵan.

Bıyl mamyr aıynda úı qaıta jańǵyrtylady dep sheshildi. Tender jarııalanyp, merdiger jumysqa kirisken.

Biraq 22 mln teńgeniń qurylysy orta jolda toqtap qaldy. Nysanda sapasyz materıaldar paıdalanǵany týraly vıdeolar áleýmettik jelige tarap, daý shyqty.

Qabyrǵasyna degen qum bloktary kópke shydaýy ekitalaı edi. Jaýapsyz merdigermen kelisim eki jaqpen úzilgen.

Oǵan bir tıyn da tólenbegendikten is sotqa jetpeıtin boldy.

– Saman kirpishten qaıta quıylǵan úı. Bylaısha aıtqanda kóriksiz, zaman talabyna sáıkes kelmeıtin, ári qaraı qalpyna keltirýge múmkindigi joq úı bolatyn. Ol dál Ahmet Baıtursynulynyń týǵan úıi emes. Sonyń irgesiniń negizinde kóterilgen úı. Úlkenderdiń aıtýynsha, aýyl adamdarynyń aıtýy boıynsha qalanǵan úı. Sondyqtan biz ony bylaısha aıtqan kezde Ahmet Baıtursynovtyń týǵan úıi jer betinen ysyrylyp tastady deýge kelmeıdi. Tarıhı shyndyqqa janaspaıdy, - deıdi mádenıet basqarmasynyń basshysy Erlan Qalmaqov.

Qazir súrilgen aýmaq tegistelip jatyr. Jańa úıdiń qurylysy jobalanyp qoıǵan. Qyrkúıekke deıin salynyp bitýi tıis.

– Joba boıynsha 149 sharshy metr. Turǵyn úıdi mýzeı úı etip, qaıta qalpyna keltirý jumystaryn júrgizedi. Jobasy 20 maýsymda alynady. Jobalyq qujatyn jasaýǵa 1,2 mln teńge demeýshiler atynan isteledi. Al endi úıdiń quny 37 mln bop tur. Ekspertızaǵa deıin. Ol ózgeredi áli, - deıdi Jangeldın aýdany qurylys bóliminiń basshysy Ádilbek Imanǵalıev.

– Qulaǵan zat qaıtyp turmaıdy ǵoı. Qansha zarlaǵanymen ol qaıtyp kelmeıdi. Endigi salatyn adam durystap salsa, kórneki qylyp. Bólingen aqsha az emes, - deıdi Aqkól aýylynyń turǵyny Kádirjan Bóribaıuly.

Al Ahańa arnalǵan kesene kerisinshe sapaly, ári qymbat Jańaózennen ákelingen temirtastan salynyp jatyr.

Aqkól men Ahmet aýyly halqynyń bastamasymen 10 mln teńgege eki aptadan keıin turǵyzylyp bitedi.

Alystan kóz tartatyn nysannyń aýmaǵy 70 sharshy metr bolady. Bıiktigi 7 metrden asady.