Qostanaı oblysynda 96 eldi mekendi sý basýy múmkin
QOSTANAI. QazAqparat - Qostanaı oblysynda sý tasqynynan tónetin qater kóp, dep habarlaıdy «Habar 24».
Aımaqta segiz myńdaı adam turatyn 96 eldi meken sý astynda qalýy múmkin. Osy rette qutqarýshylardyń dıspetcherlik qyzmeti táýlik boıy jumys isteıdi. Tótenshe jaǵdaı bola qalsa, arnaıy tehnıkalar da saqadaı-saı tur.
Qar mólsheri kóp túsken Meńdiqara, Qarabalyq, Qarasý, Sarykól aýdandaryna tórt sý aıdaý tehnıkasy men motopompa jumyldyrý kózdelgen. Oblys aýmaǵynan búginde jarty mıllıon tekshe metr qar polıgonǵa shyǵarylǵan.
Al ózen-kólderdiń muzy byltyrǵa qaraǵanda eki ese kóp jarylady. Osylaısha sýdyń óz arnasymen erkin aǵýyna jaǵdaı jasalmaq.
«Qaraǵandy oblysy Ulytaý taýlarynan keledi dep oılap otyrmyz. Qazgıdromettiń málimetinshe, sol jaqtan bıyl sý kóbirek túsedi. Reseıdiń Chelıabi oblysynan keletin sýdy áriptesterimizben naýryzda kezdesip taǵy da sóılesemiz», - deıdi oblystyq TJD basshysy Talǵat Kákimov.
