Qostanaı oblysynda 8 sanıtarlyq beket qoıyldy
QOSTANAI. QazAqparat – Qostanaı oblysynyń 6 aýdanynda sanıtarlyq beket jumys isteı bastady. Bul týraly Óńirlik kommýnıkatsııalar alańynda ótken brıfıngte Jergilikti polıtsııa qyzmeti basqarmasynyń bastyǵy Qurmet Májikenov málim etti, dep habarlaıdy QazAqparat.
Buǵan deıin Qostanaı oblysynda 12 sanıtarlyq beket ornatylǵanyn habarlaǵan edik.
Qazir onyń sany 20-ǵa deıin kóbeıip otyr.
«Búgin saǵat 00.00 - den bastap oblysta qosymsha 8 beket qoıyldy. Olardyń 5-eýi Arqalyq qalasyn jáne Qarasý, Sarykól, Qamysty jáne Uzynkól aýdandarynda bolsa, 3-eýi –Rýdnyı qalasynda. Beketterdegi jumysty qajetti qorǵanys quraldarymen jabdyqtalǵan polıtseıler men medıtsına qyzmetkerleri júzege asyrady. Bekettegi qyzmetti táýligine 12 saǵattan aýysymmen atqarady. Beketterdi qoıýdaǵy negizgi mindet – koronavırýstyq ınfektsııanyń taralýyna jol bermeý úshin halyqpen aldyn-alý jumystaryn júrgizý. Medıtsına qyzmetkerleri dene temperatýrasyn ólsheı otyryp, júrgizýshiler men jolaýshylardy vızýaldy profılaktıkalyq tekserýden ótkizedi», - deıdi Qurmet Májikenov.
Polıtsııa qyzmetkerleri sanıtarlyq beket arqyly ótetin kólikti tekserip, esepke alady, sondaı-aq oblystyń bas memlekettik sanıtarlyq dárigeriniń qaýlysynda kórsetilgen shekteý sharalarynyń saqtalýyn qadaǵalaıdy.
