Qostanaı oblysynda 775 shaqyrym avtojol jóndeýden ótedi
QOSTANAI.QazAqparat – Bıyl «Nurly jol» memlekettik baǵdarlamasy aıasynda 18,8 mlrd teńgege 37 joba iske asyrylady. Bul týraly oblys ákimi Arhımed Muhambetov depýtattarǵa esep berý jıynynda aıtty, dep habarlaıdy QazAqparat tilshisi.
Qostanaı oblysynda «Nurly jol» baǵdarlamasy boıynsha aýqymdy jumys qolǵa alynǵan. Bıyl 18,8 mlrd teńgege 37 joba iske asyrylady.
«Oblysta 499 shaqyrym jol jóndeledi. Jobanyń 20-syn qysqa deıin aıaqtaý josparlanǵan. Jalpy kólik ınfraqurylymyn odan ári damytýǵa 70 mlrd teńge jumsalýy tıis. Oǵan barlyǵy oblystyń 775 km avtojolyn qalpyna keltirý josparlanýda. Al aýdan, qala kóshelerin jóndeý men qaıta jańartýǵa 24 mlrd teńge qarastyrylǵan», - deıdi aımaq ákim.
Arhımed Muhambetov 4,4 mlrd teńge jumsalyp, qaıta qurylyp jatqan Qostanaıdaǵy kópir jumysyna da toqtaldy. Aıta keteıik, halyq arasynda «Koreı kópiri» atanǵan bul nysan turǵyndardyń shaǵymynan soń qaıta jańǵyrtylyp otyr.
«Kópirdiń áleýmettik mańyzy zor. Kóktemgi sý tasqyny kezinde Tobyl ózeniniń mańyndaǵy úılerdiń deni sý astynda qalady. Kópir arnasyn keńeıtý arqyly biz qalany tabıǵı apattan saqtap qalamyz. Sonymen qatar, kópirdiń júrý jolaqtary da keńeıtilip, kólik qozǵalysy jeńildeıtin bolady», – dedi Arhımed Muhambetov.
Buǵan deıin Arhımed Muhambetovtiń oblystyq máslıhat depýtattaryna esep bergenin habarlaǵan bolatynbyz.
