Qostanaı oblysynda 7 myń jumys orny ashylady – Arhımed Muhambetov
Oblys basshysy ótken jyly júzege asyrylǵan negizgi makroekonomıkalyq kórsetkishter boıynsha qoǵamdyq keńeske aqparat berdi.
«2019 jyly ónerkásip óndirisi 15,3%-ǵa, qurylys jumystary 6,6%-ǵa ulǵaıdy. Turǵyn úılerdi paıdalanýǵa berý boıynsha respýblıkada úzdik úshtikke endik. Syrtqy saýda aınalymyna da byltyrǵydan 13,2%-ǵa artyq taýar tartyldy. Byltyrǵy qurǵaqshylyqqa baılanysty aýyl sharýashylyǵy óniminiń kólem ındeksi azaıdy. Osyǵan qaramastan, jyl qorytyndysy boıynsha ekonomıka ósimi 3 protsentke ósti», - dep málim etti oblys ákimi.
Qostanaı oblysynda ındýstrııalandyrý baǵdarlamasy sátti jalǵasyp keledi. Ásirese, mashına qurastyrý, metallýrgııa, tamaq ónimderin óndirý salalary aıtarlyqtaı ósken. Qazirgi ýaqytta 1,5 trln teńge bolatyn 37 ınvestıtsııalyq joba ázirlenýde, shamamen 7 myń jumys orny ashylmaq.
«Avtomobıl qurastyrý salasynda ilgerileý basym. 2019 jyly 25,8 myń avtomobıl qurastyryldy. Ósim 2 ese artyq. Bıyl 50 myńnan astam avtomobıl shyǵarý josparda bar. Onyń 8 myńy eksportqa ótedi. Amerıkalyq «Chevrolet» kompanııasynyń birqatar modelderin óndirý boıynsha kelissózder júrgizilýde. Aýyl sharýashylyǵy mashınalaryn qurastyrý salasynda da jetistik jeterlik. «Kırovets» pen «Lovol» traktorlarynyń óndirisi iske qosyldy. Taıaý jyldary jergiliktendirý deńgeıin 50%-ke deıin jetkizý josparlanyp otyr», - dedi Arhımed Muhambetov.
Aımaq ákimi qoǵamdyq keńes ókilderiniń suraqtaryna jaýap berdi. Atap aıtqanda, jas mamandardy tartý, gazdandyrý, turǵyn úı qurylysy baǵytynda saýaldar qoıyldy. Al sharýalardyń alańdaýshylyǵyn týǵyzǵan egin jaıy, sýbsıdııa máselesi tıisti mınıstrlikpen birge sheshiledi.
