Qostanaı oblysynda 7 myń tonna azyq-túlik qory daıyndaldy
Bul týraly oblys ákimdiginde ótken jıynda Aýyl sharýashylyǵy jáne jer qatynastary basqarmasynyń basshysy Tımýr Bısımbaev aıtty, dep habarlaıdy QazAqparat tilshisi.
Bıyl Qostanaı oblysy un óndirisi boıynsha respýblıkada birinshi orynǵa shyqty. Nátıjesinde agroónerkásiptik keshenniń eksporttyq áleýetin arttyrýǵa múmkindik aldy. Osy jyldyń 11 aıynda azyq-túlik ónimderiniń jekelegen túrleriniń óndirisi artqan. Máselen, irimshik jáne súzbe (49,4% - ǵa), sút jáne qoıýlandyrylǵan kilegeı (45,5% - ǵa), sary maı (31% - ǵa), jarma (16,5% - ǵa) daıyndaý isi alǵa basqan.
«Turaqtandyrý qorynda quny 931,1 mln teńge bolatyn 6,9 myń tonna azyq-túlik ónimderi daıyndaldy. Atap aıtqanda, kartop – 87 tonna, sábiz – 418 tonna, qant – 121,2 tonna, kúnbaǵys maıy – 3 tonna, jumyrtqa – 385 tonna, qaraqumyq – 1 tonna, kúrish – 42,9 tonna, qyryqqabat – 310 tonna bolsa, un 5 myń tonnaǵa jýyq jınaldy. Jyl basynan beri oblysta 183 jármeńke ótip, 2028 tonna ónim satyldy. Áleýmettik mańyzy bar azyq-túlik taýarlaryna baǵany turaqtandyrý týraly 1059 memorandým jasaldy. Qazirgi ýaqytta ortalyq memlekettik organdar aýyl sharýashylyǵy taýar óndirýshilerimen kezdesip, baǵany turaqtandyrý máselelerin qarastyrýda», - deıdi basqarma basshysy.
Oblys basshysy Arhımed Muhambetov aýdandar men qalalardyń ákimderine merekeler men elektoraldy kezeńdi eskere otyryp, azyq-túlik baǵasyn baqylaýda ustaýdy tapsyrdy. Taýar jetkizýshileri jáne iri saýda ortalyqtarymen birlesip, áleýmettik mańyzy bar azyq-túlik baǵasyn tómendetý máselesin birjaqty etý de júkteldi.
