Qostanaı oblysynda 6 myń kópbalaly otbasy baspana kezeginde tur
Jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnár Ábenova aıtqandaı, baǵdarlama aıasynda 1 shildeden bastap 6192 adam turǵyn úıge ótinish bildirdi. Olardyń 968-i – kópbalaly otbasy.
«Turǵyn úıge ótinim jazǵan 402 otbasy múmkindigi shekteýli balalardy tárbıelep otyr. Bıyl az qamtylǵan jáne kópbalaly otbasylar úshin turǵyn úı satyp alýǵa 1, 8 mlrd teńge qarastyrylǵan. Qujattardy qabyldaý 22 shildeden bastaldy. Bul baǵdarlamaǵa qatysý úshin jergilikti ákimdik arqyly «Turǵyn úı qurylys jınaq banki» AQ-ǵa joldama alý qajet», - dedi Gúlnár Ábenova.
Búginde Qostanaı qalasynda az qamtylǵan 313 otbasy baspanaǵa muqtaj. Olardyń ótinishteri kezegimen qaralady. Sonymen qatar Rýdnyı qalasynda – 37 otbasy, Qostanaı aýdanynda 38 otbasy turǵyn úı alýǵa ótinim bergen. Jumyspen qamtý úılestirý basqarmasynyń málimetinshe, Altynsarın, Jangeldın, Qarasý, Naýyrzym, Sarykól, Uzynkól aýdandarynan ótinish túsken joq.
Óńirde «Nur Otan» partııasynyń «Baqytty otbasy» jobasy jemisti júzege asyp keledi. Búginde 2 myń otbasyǵa áleýmettik kómek kórsetilgen. Bul maqsatta 112,7 mln teńge jumsaldy. 42 kópbalaly otbasyǵa páter kilti tapsyryldy. Taǵy 14 otbasynyń baspanasyna jóndeý jumystary júrgizildi.
