Qostanaı oblysynda 6 aılyq bala úshinshi qabattaǵy terezeden qulap ketti
Qostanaı oblystyq TJD-nyń málimdetinshe, oqys oqıǵa 17 sáýir kún Qostanaı qalasyndaǵy B.Maılın kóshesindegi 18-úıde bolǵan.
«Keshki saǵat 17:00-de alty aılyq balanyń úshinshi qabattan ekinshi qabatta ornatylǵan kúnqaǵarǵa qulap túskeni týraly habarlama kelip túsken. Oqıǵa ornyna dereý TJD men jedel járdem qyzmetkerleri jiberildi», - dedi TJD ókili.
Qutqarýshylardyń málimetinshe, olar kelgenshe ata-anasy sábıdi jerge alyp túsken. Bala zardap shekken joq, medıtsınalyq kómekti qajet etken joq.
«Abyroı bolǵanda, bári jaqsy aıaqtalǵan. Biraq osyndaı qaýipti jaǵdaı ata-analardyń salǵyrttyǵynan bolatynyn atap ótý kerek. Qurmetti ata-analar, eger úıde bala bolsa, terezeni ashyq qaldyrmańyzdar, balany terezeniń aldyna turǵyzbaý qajet. Bala shyǵyp ketpeý úshin terezege jaqyn jıhazdy da alyp tastaý kerek. Balalardy qaraýsyz qaldyrmańyzdar!», - dep eskertedi qutqarýshylar.
Avtory Janna Musabaeva
