Qostanaı oblysynda 55 jastaǵy áıeldi quldyqta ustaǵan

QOSTANAI. QazAqparat – Qostanaılyq polıtseıler ıntımdik qyzmet kórsetetin bes qyzdy ustady. Bir áıeldi qosalqy sharýashylyq ıesi erkinen tys ustap otyrǵan, dep habarlaıdy QazAqparat tilshisi.

Polıtsııa habarlaǵandaı, 22 qarasha men 1 jeltoqsan aralyǵynda Qostanaı oblysy aýmaǵynda «STOP trafık» respýblıkalyq jedel aldyn alý sharasy ótken.

«Onyń barysynda oblystyń PD krımınaldyq polıtsııa basqarmasynyń qyzmetkerleri aqshalaı syıaqyǵa ıntımdik qyzmetter kórsetip júrgen bes qyzdy ustady. Qostanaı aýdanynyń aýmaǵynda oblystyń jedel qyzmetkerleri aýdan qyzmetkerlerimen birlesip 55 jastaǵy turǵyndy qosalqy sharýashylyqta paıdalaný maqsatynda bas bostandyǵynan zańsyz aıyrý faktisin anyqtady. Qosalqy sharýashylyqtyń ıesi ony naýryzdan bastap erkinen tys ustap otyrǵan», - dep habarlady vedomstvo.

Atalǵan fakti boıynsha Qazaqstan Respýblıkasy Qylmystyq kodeksiniń 126-baby úshinshi tarmaǵy ekinshi bóligi boıynsha qylmystyq is tirkeldi.

Sondaı-aq, «STOP trafık» jedel aldyn alý sharasyn ótkizý barysynda «Jezókshelikpen aınalysýǵa tartý» baby boıynsha qylmystyq is tirkeldi.

«Oblystyń krımınaldyq polıtsııa qyzmetkerleri Qostanaı qalasynyń 23 jastaǵy turǵynyn anyqtady, ol kizdar.net saıty arqyly aryz berýshini jezókshelikpen aınalysýǵa tartqan. Tártip saqshylary Qostanaı jáne Rýdnyı qalalaryndaǵy saýnalardy tekserý kezinde anyqtalǵan QR QK 309-baby birinshi tarmaǵy boıynsha eki qylmystyq isti tirkedi», - dedi polıtsııa.