Qostanaı oblysynda 5 pedofılge hımııalyq kastratsııa jasalýy múmkin
QOSTANAI. QazAqparat - Osy jyly Qostanaı oblysynda 5 jazasyn óteýshi pedofılge hımııalyq kastratsııa jasalýy múmkin, - dep habarlaıdy QazAqparat oblystyq qylmystyq ister jónindegi mamandandyrylǵan aýdanaralyq sotynyń tóraǵasy Erlik Seralınge silteme jasap.
Sot tóraǵasynyń málimeti boıynsha, bıyl oblys boıynsha 5 pedofıldiń jaza merzimi aıaqtalady.
«Olar bostandyqqa shyǵýǵa 6 aı qalǵan ýaqytta arnaıy sot-psıhıatrııalyq saraptamadan ótedi. Tekserý nátıjesinen soń olardyń pedofılııaǵa ushyraǵany dáleldense, hımııalyq kastratsııa jasalady. Bir jaǵynan hımııalyq preparattar adam densaýlyǵyna aıtarlyqtaı áser etedi. Qylmyskerdiń densaýlyǵy kastratsııany kótere almaýy da múmkin. Ondaı jaǵdaıda pedofılge kastratsııa jasalmaıdy», - dep túsindirdi Seralın.
Belgili bolǵandaı, hımııalyq kastratsııa tek sottyń úkimimen arnaıy saraptamanyń qorytyndysy boıynsha ǵana qoldanylady. Androgendi dári ınektsııalary bas bostandyǵynan aıyrylǵan azamattarǵa jazasyn óteý mekemelerinde, al ózge jaza túrlerine sottalǵandarǵa densaýlyq saqtaý mekemelerinde júzege asyrylatyn bolady.
Aıta keteıik, 2018 jyldyń 1 qańtarynan bastap pedofılderge hımııalyq kastratsııa jasaýǵa ruqsat beretin zań normasy kúshine endi.
