Qostanaı oblysynda 5 mıllıonnan astam gektar alqapqa egin egiledi
QOSTANAI. QazAqparat - Bıyl Qostanaı oblysynda 3 mln 487 myń gektarǵa bıdaı tuqymy sebiledi. Bul týraly oblys ákiminiń birinshi orynbasary Ǵaýez Nurmuhambetovtiń qatysýymen ótken agrokeńeste aıtyldy, dep habarlaıdy QazAqparat.
Tobyl óńirinde egis naýqanyna ázirlik barysy qyza tústi. Oblystyq aýyl sharýashylyǵy basqarmasy bergen málimetterge súıensek, bıyl barlyǵy 5 mıllıonnan astam gektar alqapqa egin egiledi. Aıta ketý kerek, jyldan jylǵa bıdaı alqaptarynyń kólemi azaıtylyp keledi. Máselen, ústimizdegi jyly barlyǵy 3 mln 487 myń gektarǵa bıdaı tuqymy sebiledi. Kerisinshe, arpa egiletin alqap 32 myń gektarǵa ulǵaıǵan. Burshaq tuqymdas daqyldar da 32 myń gektarǵa, qaraqumyq alqaby 1,4 myń gektarǵa artty. Maıly daqyldardyń kólemi 444,3 myń gektarǵa ósken. Bul jer emgen sharýalar úshin óte tıimdi deıdi mamandar. Óıtkeni, qazirgi naryqta bıdaı baǵasynan góri maıly daqyldarǵa degen suranys zor. Onyń ústine olardyń ózindik quny eki-úsh ese joǵary.
«Egin egýge Tobyl, Áıet, Jelqýar ózenderiniń aınalasyndaǵy alqaptardyń múmkindigi zor. Bul Qamysty, Jitiqara, Denısov, Taran, Qostanaı, Meńdiqara aýdandary men Arqalyq qalasy úshin óte mańyzdy. Máselen, Qamysty aýdanyndaǵy Borıs Knıazev basqaratyn «Altynsarın» JShS-in alyńyz. Aıdalada, sýsyz jerde ornalasqan sharýashylyq qoldan qazylǵan qazandyqtan sý qubyryn tartý arqyly jem-shóp ósirýge 250 gektar tamshylatyp sýaratyn alqapty kádege jaratyp otyr. Aýdan, qala ákimderi osy máseleni jan-jaqty zerttep, jaqyn arada oblystyq aýylsharýashylyq basqarmasyna óz usynystaryn jiberýi tıis. Óıtkeni, tamshylatyp sýarý tásili bizdiń óńir úshin asa qajet tehnologııalardyń biri», - dedi Ǵaýez Nurmuhambetov.
Dıqandardy tolǵantqan endigi bir másele - dán sińirýge tıisti tehnıkalardyń isten shyǵyp qalýy. Sharýalardyń sózinshe, tehnıkalardyń kóktemgi egiske ázirliginiń tómendiginen dán sińirý jumystary kesheýildep qalady. Kóptegen kólikterdiń tozyǵy jetken, jıi buzylady. Búgingi tańda oblysta 24 myń traktordyń jıyrma myńdaıy nemese 83% kónergen. Oblys ákiminiń birinshi orynbasary aýdan, qala ákimderine qolda bar tehnıkalardy kóktemgi dala jumystary bastalǵansha ázirlep, jyl saıyn tehnıka parkin keminde 4-5% jańalap otyrý qajettigin qadap tapsyrdy.
Belgili bolǵandaı, bıyl egis naýqany jumystaryna 71 myń tonna dızel otyny bólindi. Onyń 1 lıtrge shaqqandaǵy quny 151,5 teńgeden aınalady.
«Bul úlken járdem. Áıtpese, bólshek saýdada janar-jaǵarmaıdyń bir lıtri 167 teńge. Sharýashylyqtar suıyq otyn baǵasyn ýaqtyly tólep, der kezinde tasyp alǵany jón», deıdi aýyl sharýashylyǵy basqarmasynyń mamandary.
Jalpy, ústimizdegi jyly oblystyń aýylsharýashylyq salasyn damytýǵa memleket 27,3 mlrd teńge sýbsıdııa bóldi. Onyń 10,9 mlrd teńgesi - ósimdik sharýashylyǵyna, 5,3 mlrd teńgesi - mal sharýashylyǵyna, basqa maqsatqa 11,1 mlrd teńge qarjy qarastyrylǵan. Aýylsharýashylyq maqsatyna bólingen barlyq qarajat «Agrarlyq nesıe korporatsııasy» AQ arqyly júzege asyrylady.
