Qostanaı oblysynda 5 qabatty úı órtenip, bir adam kóz jumdy
QOSTANAI. QazAqparat - Lısakov qalasyndaǵy bes qabatty turǵyn úıden órt shyǵyp, bir adam kóz jumdy, dep habarlaıdy QazAqparat.
11 naýryz kúni saǵat 20:20-da Qostanaı oblysy TJD órtke qarsy qyzmet pýltine Lısakov qalasyndaǵy bes qabatty turǵyn úıden órt shyqqany týraly habarlama kelip tústi. Oqıǵa ornyna kelgen órt sóndirýshiler avtosaty arqyly 5 adamdy qutqardy. Taǵy 20 adam evakýatsııalandy. Onyń ishinde tórteýi bala.
«Órt saǵat 22:15-te tolyǵymen sóndirildi. Oqıǵa ornynda 1968 jyly týǵan er adamnyń máıiti tabyldy. 3 qabattaǵy páterde 1923 jyly týǵan áıelge ıis tıip, aýrýhanaǵa jetkizildi. Órttiń aldyn ala sebebi - temeki shegý kezinde otty abaısyz paıdalaný», - delingen vedomstvonyń baspasóz habarlamasynda.
Órt sóndirýge Qostanaı oblysy TJD jeke quramynan 14 adam jáne 3 órt sóndirý tehnıkasy jumyldyryldy.
