Qostanaı oblysynda 5,2 mln gektar alqapqa dán sebiledi
QOSTANAI. QazAqparat – Bıyl Qostanaı oblysynda tyńaıtqyshtardy qoldaný kólemi artady. Óıtkeni byltyr bıýdjet qarajatyn ulǵaıtý esebinen óńir agrarshylary 45 myń tonna sýbsıdııalyq mıneraldy tyńaıtqysh alǵan, dep habarlaıdy QazAqparat.
Qostanaı oblysy ákiminiń orynbasary Ǵaýez Nurmuhambetovtiń aıtýynsha, 2019 jyly 391 mlrd teńgeniń aýyl sharýashylyǵy ónimi óndirilgen. Bul ótken jyldardaǵy kórsetkishpen salystyrǵynda eki esege artyq.
«2020 jyly 5,2 mln gektar alqapqa dán sebiledi. Onyń 3 mln 850 myń gektaryna dándi daqyldar egiledi. Al maıly daqyldar alqaby 700 myń gektarǵa kóbeıtilip otyr. 2015 jyldan beri maıly daqyldar tuqymy eksporty 38% ósken. Qaıta óńdeý kásiporyndarynyń jumys ónimdiligi 2 ese, al osy salalaǵy eksport 8 ese artqan», - dedi Ǵaýez Nurmuhambetov.
Osy jyly óńirde 50 myń tonna tyńaıtqysh satyp alý josparlanyp otyr. Mıneraldy tyńaıtqyshtardy qoldanatyn fermerler úshin jergilikti bıýdjetten 3 mlrd teńge sýbsıdııa qarastyrylǵan.
«Respýblıka boıynsha egis alqaby 2020 jyly 22,5 mln ga quraıdy, bul 2019 jylǵa qaraǵanda 237,7 myń gektarǵa artyq. Bul rette dándi jáne burshaqty daqyldar ótken jylmen salystyrǵanda azaıǵan, al maıly daqyldar kerisinshe, 122,2 myń ga kóp. Bıyl kókónis-baqsha daqyldary men kartoptyń boljamdy kólemi 19,3 myń gektarǵa, mal azyǵy 308,6 myń gektarǵa artyq. Qazaqstanda egis naýqanyn júrgizý úshin 2,47 mln tonna sapaly tuqym daıyndaldy, onyń ishinde dándi daqyldar – 1,94 mln tonna, maıly daqyldar – 89 myń tonna, jem-shóp 15,7 myń tonnaǵa jetti», - dedi óńirge jumys saparymen kelgen QR Aýyl sharýashylyǵy vıtse-mınıstri Rústem Qurmanov.
Elimizde kóktemgi dala jumystaryn júrgizýge aýyl sharýashylyǵy tehnıkasyn daıyndaý josparly túrde júrgiziledi. Oblys ákimdikteriniń 1 naýryzdaǵy derekteri boıynsha traktorlardyń kóktemgi egis jumystaryn júrgizýge daıyndyǵy 82%-dy qurady.
Egin egý barysynda 4 myńnan astam zamanaýı joǵary ónimdi keshender paıdalanylady. Olar egis alqabynyń 70%-yn egýge kómektesedi.
