Qostanaı oblysynda 429 áleýmettik nysan jóndeledi

ASTANA. QazAqparat - 2016 jyly Qostanaı oblysynda «Jumyspen qamtýdyń 2020 jol kartasy» baǵdarlamasynyń jumyspen qamtýdy, ınfraqurylymdy jáne turmystyq-kommýnaldyq sharýashylyqty damytý arqyly qarastyratyn birinshi baǵytyn iske asyrýǵa respýblıkalyq bıýdjetten 5,2 mlrd.teńge bólindi. Osy qarajat esebinen 429 ınfraqurylymdyq nysandy iske asyrý josparlanýda. Bul týraly QR Densaýlyq saqtaý jáne áleýmettik damý mınıstrliginiń baspasóz qyzmeti habarlady.

Jóndeletin ǵımarattardyń 139-y - bilim berý, 30-y - mádenıet, 1-ýi - densaýlyq saqtaý jáne 130-y - transporttyq ınfraqurylym, 6-ýy - áleýmettik qorǵaý, 18-i - sport, 3-ýi - kommýnaldyq-ınjenerlik ınfraqurylym, 102-si - abattandyrý  nysany.

Infraqurylymdyq jobalardyń iske asyrylýy 4 877 jumys ornyn qurýǵa múmkindik beredi, onyń ishinde 2 583 adam jumyspen qamtý ortalyqtary arqyly ornalastyrylady.

Búgingi kúni 368 jobanyń iske asyrylýy bastaldy, onyń sheńberinde 2 277 adam jumysqa turdy, olardyń ishindegi 1 307 adam - «JQJK 2020» baǵdarlamasyna qatysýshylar.

2015 jyly «JQJK 2020» baǵdarlamasynyń birinshi baǵytyn iske asyrýǵa 13,7 mlrd teńge bólingenin, jalpy respýblıka boıynsha 588 ınfraqurylymdyq jobalar júzege asyrylyp, 8,6 myń adam jumysqa ornalastyrylǵanyn esterińizge salamyz. 2016 jyly «JQJK 2020» baǵdarlamasynyń birinshi baǵytyn iske asyrýǵa 80,1 mlrd. teńge bólindi. Bul qarajat jobalardyń sany eskerile otyryp, jergilikti atqarýshy organdardyń tapsyrystary negizinde óńirler arasynda bólinedi.