Qostanaı oblysynda 42 jastaǵy er adam órtten kóz jumdy

QOSTANAI. QazAqparat – Qostanaı oblysynyń Meńdiqara aýdanynyń turǵyny óz páterinde ıis tıip qaza tapty, dep habarlaıdy QazAqparat Qostanaı oblystyq tótenshe jaǵdaılar departamentiniń baspasóz qyzmetine silteme jasap.

Oqıǵa 30 mamyrǵa qaraǵan túni bolǵan. Aleshınka aýylynyń turǵyndary úıinen tútin ıisin sezgen.

Kórshi páterde 1979 jylǵy, alkogoldi ishimdikke jıi salynatyn jalǵyzbasty er adam turǵan.

«Kórshiler saǵat 00:18-de órt sóndirý qyzmetin shaqyrdy. Aýyl men órt sóndirý qyzmeti bólimirniń arasy – 30 shaqyrym. Úı turǵyndary órt sóndirýshiler kelgenshe páter terezesin syndyryp, ishke kirgen. Úıdiń jartysy tútinge oranǵan. Bólmelerdiń birinde 20 sharshy metr jerde tósek jabdyqtary byqsyp, jıhaz órtendi. Úı ıesi kórshi bólmede edende jatqan. Oqıǵa ornyna kelip jetken qutqarýshylar ony aýlaǵa shyǵardy. Biraq er adam oqıǵa ornynda kóz jumǵan», - dep habarlady vedomstvodan.

Órt sóndirýshiler byqsyp janǵan úı zattaryn, jıhaz, janǵysh bólikterdi sýmen sóndirdi.

Jalyn saǵat 01:20-da aýyzdyqtalyp, 01:50-de tolyq sóndirildi.

«Aýyl turǵyndary órt sóndirýshilerge jalyndy sóndirýde kóp kómek kórsetti. Olar aýlalyq uńǵymadan (skvajına) sýdyń toqtaýsyz kelýin qamtamasyz etip berdi. Oqıǵa ornynda TJD zertteý-synaq júrgizý órt sóndirý zerthanasynyń mamandary jumys istep jatyr. Órttiń shyǵý sebebi anyqtalýda», - dep túıindedi TJD-dan.