Qostanaı oblysynda 400 oryndyq jańa aýrýhana salynady

NUR-SULTAN. QazAqparat – Búgin QR Densaýlyq saqtaý mınıstri Alekseı Tsoı Qostanaı oblysynyń ákimi Arhımed Muhambetovpen kezdesti, dep habarlaıdy QazAqparat tilshisi.

Oblys ákiminiń baspasóz qyzmeti málim etkendeı, qos tarap Qostanaı qalasynda kópbeıindi aýrýhana salý týraly memorandýmǵa qol qoıǵan.

Bul maqsatta bıyl jalpy aýdany 20 gektar jer ýchaskesi bólindi.

Nysannyń qýaty - 400 kereýet-oryn. 6 qabatty ǵımarattyń jalpy aýdany – 67 myń sharshy metr.

Joba memlekettik-jekemenshik áriptestik esebinen júzege asyrylady. Jańa aýrýhananyń statsıonary birneshe bólikke jiktelgen.

Atap aıtqanda, kardıologııalyq bólimge 90 kereýet, nevrologııa –65, hırýrgııa –155, terapııa –70, ońaltý sharalary úshin 20 oryn qarastyrylǵan.

Jańa kópbeıindi aýrýhana eń zamanaýı medıtsınalyq tehnıkamen jabdyqtalady.

MRT, KT, rentgen, mammograf, ostıodensıtometr syndy qural-jabdyqtar memlekettik-jekemenshik áriptestik sheńberinde satyp alynady.