Qostanaı oblysynda 4 jasóspirim esirtkimen ustaldy
Qostanaı stantsııasyndaǵy Jelilik polıtsııa bóliminiń qyzmetkerleri temir jol vokzaly mańynan 2002-2003 jyldary týǵan 4 jasóspirimdi anyqtap, teksergen. Olardan gazet qaǵazyna oralǵan býma tárkilendi, ishinde ózindik ıisi bar, ashyq jasyl tústi ósimdik tektes zat bolǵan.
«Kólik polıtseıleri olardyń ata-analaryn shaqyrtyp, zańdy ókilderdiń jáne jasóspirimderdiń qatysýymen atalǵan zattardy tárkiledi.
Saraptama qorytyndysyna sáıkes, qaǵaz býma ishinde jalpy salmaǵy 7,14 gr bolatyn «keptirilgen marıhýana» esirtki zaty bolǵan.
Atalǵan fakti sotqa deıingi tergep-tekserýdiń biryńǵaı tiziliminde QR QK 296-babynyń 2-bóligimen (Esirtki, psıhotroptyq zattardy zańsyz daıyndaý, qaıta óńdeý, ıemdený, saqtaý, tasymaldaý) tirkeldi», - delingen aqparatta.
Qostanaı oblysy Kámeletke tolmaǵandar isteri jónindegi mamandandyrylǵan aýdanaralyq sotynyń qaýlysymen quqyqbuzýshylar kináli dep tanylyp, 30 saǵat merzimge qoǵamdyq jumystarǵa tartý jazasy taǵaıyndaldy. Sondaı-aq ata-analarynyń qadaǵalaýymen 6 aı merzimge probatsııalyq baqylaý qoıyldy.
Buǵan qosa, kámeletke tolmaǵandardyń zańdy ókilderine qatysty QR ÁQBtK 127-baby (Ata-ananyń kámeletke tolmaǵan balalardy tárbıeleý boıynsha mindetterin oryndamaýy) boıynsha ákimshilik hattamalar toltyrylyp, is sotqa joldandy.