Qostanaı oblysynda 4,9 mln gektar alqapqa astyq egildi
QOSTANAI.QazAqparat – Qostanaı oblysynda 4,8 mln gektar alqapqa astyq egildi. Bul týraly oblystyq aýyl sharýashylyǵy jáne jer qatynastary basqarmasynyń basshysy Jansultan Táýkenov málim etti, dep habarlaıdy QazAqparat tilshisi.
Basqarma basshysy egin jınaý jumystary men jem-shóp daıyndaýdy uıymdastyrý máseleleri týraly aıtty.
«Aýyl sharýashylyǵy taýar óndirýshilerine karantın kezinde barlyq qajetti jaǵdaılar jasaldy. Oblys ishinde kedergisiz júrip-turdy, materıaldyq-tehnıkalyq resýrstardy jetkizý qamtamasyz etildi, qarjy máselelerinde qıyndyq týyndaǵan joq. Osynyń arqasynda kóktemgi egis jumystary ońtaıly merzimde, jaqsy daıyndalǵan negizde júrgizildi. Jazdyq egis alańy 4 mln 865 myń ga qurady, bul ótken jyldyń deńgeıinen 186 myń ga artyq. Dándi daqyldar 85 myń gektarǵa ulǵaıyp, 4 mln 53 myń ga, maıly daqyldar 640,5 myń ga alqapqa sebildi. Mıneraldy tyńaıtqyshtardy qoldaný dınamıkasy da ósýde. Aıta ketý kerek, bıyl zańnamadaǵy ózgeristerge sáıkes asa qaýipti aýrýlar men zııankesterge qarsy óńdeýdi taýar óndirýshilerdiń ózderi tolyǵymen júrgizdi. Insektıtsıdterdi satyp alýdy sýbsıdııalaýǵa respýblıkalyq bıýdjetten 469 mln.teńge bólindi», - deıdi Jansultan Táýkenov.
2020 jyly oblystyń AÓK damytýǵa 39,3 mlrd teńge qarastyryldy. «QazAgro» AQ qarjy ınstıtýttary arqyly kóktemgi egis jáne egin jınaý jumystaryna 29,1 mlrd teńge nesıe qarajaty berildi. Buǵan qosa «Agrarlyq nesıe korporatsııasy» AQ arqyly 22,3 mlrd teńge ıgerildi.
«Qarapaıym zattar ekonomıkasy» baǵdarlamasy sheńberinde aýyl sharýashylyǵy ónimderin satyp alý boıynsha qosymsha qarajat baǵyttaldy. Aýyl sharýashylyǵy qurylymdaryn ýaqtyly qarjylandyrý ońtaıly merzimde egis naýqanyn júrgizýge, egin jınaý jumystaryna daıyndalýǵa múmkindik berdi. Endi jergilikti ákimder ishki naryqty saqtaý, azyq-túlik ónimderiniń negizgi túrlerine baǵanyń kúrt ózgerýine jol bermeý kerek», - dep atap ótti basqarma basshysy.
