Qostanaı oblysynda 385,3 myń gektar alqapqa shegirtkeniń ýy sebildi

ASTANA. QazAqparat - Qostanaı oblysynda úıirli shegirtkelerge qatysty monıtorıng jalǵasyp jatyr. Mamandar zııankesterdiń bar-joǵyn anyqtaý úshin 2 mln gektardan astam jerdi zerttedi. 409,3 myń gekter jerge dári sebý kerek dep tanylyp, 385,3 myń gektar alqapqa (94,1%) shegirtkege qarsy ý sebildi, dep habarlaıdy QR AShM baspasóz qyzmeti.

Sonymen qatar, jándikterdiń taralýy tirkelgen jekelegen sharýa qojalyqtarymen naqty jumys júrgizilip jatyr.

Máselen, Naýyrzym aýdanyndaǵy «Koshkodan S.I.» sharýa qojalyǵynyń zertteý alańy 3,7 myń gektardy quraıdy. Shekara mańyndaǵy aýdandardy kóshpeli shegirtke basýyna baılanysty osy aýmaqtyń barlyǵyn dárileý kerek.

Sharýa qojalyǵynyń basshysy óz qarajaty esebinen 1,6 myń ga, bıýdjet qarajaty esebinen 2,1 myń ga jerdi óńdedi. Hımııalyq óńdeýdi júrgizý úshin avıatehnıka men aerozoldi gaz generatory jumyldyryldy. 14 shildedegi jaǵdaı boıynsha qorǵanys sharalary aıaqtaldy. Egisterdi baqylaý tekserisi sharýa qojalyǵy basshysynyń qatysýymen júrgizildi. Egistikke zııankesterden zaqym kelgen joq.

Sonymen qatar, Jangeldın aýdanynda «Kasenov T.G.» sh/q maqsary egistikterine monıtorıng júrgizý kezinde alqapqa azdap zaqym keltirgeni anyqtaldy. Vızýaldy tekserý kezinde aqbókenderdiń taptaýynyn kelgen zaqym ekeni anyqtaldy, buǵan janýarlardyń tuıaqtarynyń izderi, jatqan jerleriniń oryndary jáne tezekteri dálel boldy.

Maqsary men basqa ósimdikterdiń barlyq qaldyqtarynda aqbókenderdiń qorektený belgileri, shegirtkelerden zaqymdaný izderi tabylǵan joq.

Sonymen qatar, birqatar BAQ pen áleýmettik jelilerde taratylǵan óńirde 10-20 myń ga alqap shegirtkeden zardap shekkeni týraly aqparattyń shyndyqqa janaspaıtynyn habarlaımyz. Barlyq ózekti jáne shynaıy aqparat memlekettik organdardyń resmı veb-resýrstarynda jarııalanyp otyrady.