Qostanaı oblysynda 38 emdeý mekemesi qalypty jumysqa kóshti
QOSTANAI.QazAqparat – Óńirdegi epıdemıologııalyq ahýaldyń jaqsarýyna baılanysty provızorlyq statsıonarlar jabylyp jatyr. Qazirgi tańda olardyń bazasynda dezınfektsııalyq óńdeý júrgizilýde, dep habarlaıdy QazAqparat oblys ákiminiń janyndaǵy jedel shtabqa silteme jasap.
Aldaǵy ýaqytta shuǵyl jáne josparly akýsherlik-gınekologııalyq jáne hırýrgııalyq beıindegi naýqastardy qabyldaý men emdeý sharalary qaıta bastalady. Basqa da naýqastardy qabyldaý qalypty formatta jalǵasady. Búginde óńirdegi 38 emdeý mekemesi patsıent qabyldaý jumysyn bastap ketti.
Osy rette Mindetti álemýmettik medıtsınalyq saqtandyrý (MÁMS) júıesin qarjylandyrý kólemi josparly medıtsınalyq qyzmet kórsetý jumystarynyń qaıta bastalýyna baılanysty ulǵaıa túspek. Ázirge, bul baǵytta osy jylǵa bólingen somanyń 30 protsenti ıgerilgen. Oblys boıynsha statsıonarlyq kómek kórsetýge barlyǵy 10 mlrd teńge bólindi.
Qazir oblysta KVI dıagnostıkalyq sharalary jeti zerthana bazasynda júrgizilip jatyr. Olar táýligine 2500-den astam zertteý júrgizýge qaýqarly.
Budan bólek oblysta dárigerlerdi qoldaý sharalary jalǵasýda. Aýdandar úshin 80 sanıtarııalyq kólik satyp alyndy. Jaqyn arada taǵy 30 birlik tehnıka satyp alý josparlanyp otyr.
«Halyqty dári-dármekpen qamtý maqsatynda oblysta turaqtandyrý qory quryldy. Farmatsevtıkalyq uıymdarǵa 300 mln teńge somasynda qaıtarymdy qarjy bólindi. Kadr tapshylyǵyn boldyrmaý úshin densaýlyq saqtaý salasyna 27 maman tartý sharalary iske asyp jatyr. Jaqyn arada jas mamandarǵa 20 páter beriledi», - delingen shtab aqparatynda.
