Qostanaı oblysynda 379,4 myń sharshy metr turǵyn úı paıdalanýǵa berildi
Oblys ákimdiginiń ekonomıka jáne bıýdjettik josparlaý basqarmasynyń basshysy Gúlbaram Musaǵazınanyń aıtýynsha, 2020 jyldyń qorytyndysy boıynsha oblysta oń ósim baıqalady. Atap aıtqanda ónerkásip óndirisiniń ósimi – 7,4%, óńdeý salasy –20,2%, aýyl sharýashylyǵy –20,8%, qurylys jumystary –28,4%, turǵyn úılerdi iske qosý 13,1%-ǵa artqan. Oblys ekonomıkasyna 329,5 mlrd teńge ınvestıtsııa tartyldy. Basqarma basshysy ár aýdan-qalanyń jetistikterine toqtaldy.
«Ótken jyldyń basynan beri ónerkásip kásiporyndary 1,5 trln teńge paıda túsirgen. Ónerkásip óndirisiniń ósýi aýdandardaǵy kásiporyndardyń úılesimdi jumysy esebinen qamtamasyz etildi. Meńdiqara aýdanynda sary maı men súzbe óndirisi jolǵa qoıylyp, jylý energııasy men aýyz sýdy paıdalanýǵa berý kólemi ulǵaıdy. Qarasý aýdanynda un, nan, taýarlyq beton óndirisi jemisin berdi. Qostanaı qalasynda bolattan jasalǵan shanaqtar men tehnıka qosalqy bólshekteri, traktorlardyń, jeńil jáne júk avtomobılderiniń óndirisi ulǵaıdy, sondaı-aq shujyq pen un naryǵynda ósim baıqalady. Qarabalyq aýdanynda qıyrshyq tas pen jem shyǵarý kólemi artty», - deıdi G.Musaǵazına.
Aýyl sharýashylyǵy óniminiń 75% - dan astamy oblystyń 11 óńirine (Qarasý, Qostanaı, Fedorov, Sarykól, Meńdiqara, Qarabalyq, Áýlıekól, Uzynkól, Qamysty jáne Beıimbet Maılın aýdandary, Arqalyq qalasy) tıesili. Óńirlerde qurylys ındýstrııasy qarqyndy ósip keledi. 2020 jyly oblysta 379,4 myń sharshy metr turǵyn úı paıdalanýǵa berildi.
Oblys ákimi Arhımed Muhambetov áleýmettik-ekonomıkalyq kórsetkishterdi jaqsartý boıynsha tıisti basqarmalar men aýdan-qalalardyń basshylaryna tapsyrma júktedi.
«2020 jyl eshkimge ońaıǵa túsken joq. Ekonomıkanyń ár salasy aıtarlyqtaı zııan shekti. Degenmen, negizgi makroekonomıkalyq kórsetkishterdiń ósý qarqyny boıynsha oblys jetekshi orynǵa shyqty. Aldaǵy ýaqytta da memlekettik baǵdarlamalardyń oryndalýy, nysanaly ındıkatorlardyń strategııalyq kartasynyń iske asýy nazarymyzda bolady. Eń bastysy ákimder jergilikti problemalardy baqylaýda ustaýy tıis. Áleýmettik-ekonomıkalyq damýdyń barlyq kórsetkishterine oń serpin ber qajet», - dep túıdi oblys basshysy.
