Qostanaı oblysynda 35 jastaǵy jigit ózenge batyp ketti
QOSTANAI.QazAqparat – Qostanaı oblysy qutqarýshylary 35 jastaǵy er adamnyń denesin sýdan alyp shyqty, dep habarlaıdy QazAqparat oblystyq TJD baspasóz qyzmetine silteme jasap.
Oqıǵa Qarabalyq aýdanynyń Shadyqsaı aýylynan úsh shaqyrym jerde bolǵan. Qutqarýshylar Úı ózeninen 35 jastaǵy er adamnyń denesin alyp shyqqan.
«Dál osy kúni jergilikti TJ bóliminiń qyzmetkerleri iri aýylsharýashylyq kásipornynyń mamandarynyń qatysýymen jınalys ótkizdi. Otyrysqa qatysýshylar órt qaýipsizdigi, sý obektileri men ormandaǵy qaýipsizdik máselelerin qarastyrdy. Biraq, mamandardyń nusqaýlyǵyna qaramastan er adam otbasymen demalysta júrgende shomylý kezinde batyp ketken. Oqıǵanyń mán-jaılary anyqtalady. Sot-medıtsınalyq saraptama taǵaıyndaldy», delingen TJD baspasóz habarlamasynda.
Aıta keteıik, oqıǵa ornyna Qostanaı oblysy TJD jeke quramynyń bes qutqarýshysy, bir júzý quraly men tehnıkasy, aýdandyq polıtsııa bóliminiń tórt qyzmetkeri jumyldyryldy.
Buǵan deıin Qostanaı oblysynda 25 jastaǵy er adamnyń sýǵa batyp ketkeni habarlandy.
Qutqarýshylar turǵyndardy sýǵa túskende barynsha saq bolýdy eskertedi. Qatty ystyq kúnde demalys oryndaryna, orman, saıabaq aımaqtary men jabdyqtalmaǵan jaǵajaılarǵa barmaýǵa shaqyrady.
