Qostanaı oblysynda 313 zańsyz qoqys tógý orny anyqtaldy
QOSTANAI. QazAqparat – Qostanaı oblysynda ekologııalyq máselelerdi retke keltiretin «Adaldyq alańy» jobalyq keńsesi ashyldy, dep habarlaıdy QazAqparat.
Jobalyq keńsege kez kelgen turǵyn memlekettik mekemedegi qyzmetkerlerdiń tártibi men ekologııalyq zańnamanyń buzylýy týraly habarlaı alady. Jemqorlyqtyń aldyn alýmen aınalysatyn keńse jumysyna úkimettik emes uıymdar men kásipkerler, qoǵam belsendileri de tartylǵan.
«Prezıdentimizdiń tapsyrmasy boıynsha, memlekettik qyzmetshiler men halyq arasyndaǵy kedergilerdi joıý sheńberinde arnaıy jobany qolǵa alyp otyrmyz. «Adaldyq alańy» sybaılas jemqorlyqtyń aldyn alýǵa baǵyttalǵan shtab. Ázirge bul keńse memlekettik qyzmettiń eki túrin kórsetedi. Qyzmetterdiń kóbi elektrondy portal arqyly júrgiziledi», - deıdi oblystyq ekologııa jáne qorshaǵan ortany qorǵaý departamentiniń basshysy Vıktor Muhamedjanov.
Rasymen de, oblysta qatty turmystyq qaldyqtardy saqtaý jáne qaıta óńdeýmen aınalysatyn kásiporyn joq. Ekologııa jaǵdaıyna alańdaıtyn turǵyndar buǵan deıin oblys ákimine birneshe ret hat joldaǵan. Olar qoqys oryndarynyń talapqa saı kelmeıtinine shaǵymdanǵan.
«Byltyr bul baǵytta birtalaı jumys atqaryldy. Spýtnık arqyly 313 zańsyz qoqys aımaǵy anyqtalyp, onyń jartysy jergilikti ákimdikter kúshimen joıylǵan. Alaıda, ortalyqtan tys aımaqtarda, dalada, jol boıynda kúl-qoqys tógip ketetinderdi ustaý qıyndyq týǵyzady. Endi bul keńse sý ınspektsııasymen, Geologııa jáne jer qoınaýyn paıdalaný departamentimen, sondaı-aq, orman sharýashylyǵy ókilderimen birlesip jumys isteıtin bolady», - dedi departament basshysy.
