Qostanaı oblysynda 3,5 myńǵa jýyq medıtsına qyzmetkerine ótemaqy tólendi
QOSTANAI. QazAqparat – Qostanaı oblysynda koronavırýs ınfektsııasyna qarsy kúrestiń aldyńǵy shebinde júrgen dárigerlerge ótemaqy tólený jalǵasyp jatyr, dep habarlaıdy QazAqparat oblys ákiminiń baspasóz qyzmetine silteme jasap.
Qostanaı oblysynda 527 medıtsına qyzmetkeri, onyń ishinde 117 dáriger men 410 medbıke koronavırýs ınfektsııasyna qarsy kúres sharasynyń bel ortasynda júr. Birneshe aı aýrýhanadan shyqpaı, indetpen kúresip jatqan dárigerlerge memleket tarapynan kórsetilip jatqan materıaldyq qoldaý da qomaqty. Osy ýaqytqa deıin indetke qarsy emdeý sharalaryn júrgizgen 3 500-ge jýyq medıtsına qyzmetkerine jalpy kólemi 615,7 mln teńge ótemaqy tólengen.
Jalpy, oblys aýmaǵyndaǵy sanıtarlyq-dezınfektsııalyq rejımniń saqtalýyn ákimdikter men «Atameken» UKP, Taýarlar jáne kórsetiletin qyzmetterdiń sapasy men qaýipsizdigin baqylaý organdarynyń ókilderinen, sondaı-aq jergilikti polıtsııa qyzmetkerlerinen qurylǵan 40 monıtorıng toby baqylap keledi. Arnaıy top búginge deıin 4 myńnan astam reıd júrgizip, jalpy sany 1 670 shaǵyn azyq-túlik dúkeni men iri saýda ortalyǵyn teksergen.
Karantın kezinde monıtorıng toby júrgizgen tekserý sharasynyń nátıjesinde 342 tártip buzýshylyq anyqtalyp, 20 bıznes nysannyń qyzmeti toqtatyldy. Sondaı-aq 125 ákimshilik hattama toltyrylyp, sotqa jiberildi.
