Qostanaı oblysynda 2800 kásipkerdiń salyqtyq qaryzy keshiriledi
QR Qarjy mınıstrliginiń málimetine sáıkes, salyqtyq raqymshylyqqa baılanysty keıbir zańnamalyq aktilerge ózgerister endi. Osyǵan oraı, arnaıy zań jobasy ázirlendi. Salyqtyq amnıstııa Qazaqstan boıynsha osy jyldyń 1 qańtarynan bastaldy. Jalpy alǵanda, respýblıkada 90 077 orta jáne shaǵyn bıznes sýbektisi raqymshylyqqa iligedi. Onyń 31 210-y - zańdy tulǵa, 58 867-si - jeke kásipker. Al Qostanaı oblysynda 2 800 kásipker jalpy somasy 3,6 mlrd teńge bolatyn salyq mindettemesinen bosatylady.
«Bul joba 2018 jyldyń 1 qazanynan bergi qaryzdaryn 2019 jyldyń 31 jeltoqsanyna deıin ótegen jaǵdaıda, shaǵyn jáne orta bıznes salyǵynyń ósimaqysy men aıyppuldaryn alyp tastaýdy kózdeıdi. Munymen qosa, 2018 jyldyń 1 qazanynan bergi negizgi qaryzǵa qosylǵan ósimpul da salyq tólengenge deıin esepke alynbaıdy. Barlyq kásipkerlerdi memleket usynyp otyrǵan múmkindikti qoldanýǵa shaqyramyz», - dep túsindirdi Qostanaı oblysy Kásipkerler palatasynyń sarapshysy Jibek Seıitova.
Sarapshy sózinshe, iri salyq tóleýshiler, jer qoınaýyn paıdalanýshylar (jerasty sýlaryn jáne emdik balshyqtardy qoldanýshylardan basqa), sondaı-aq aktsızdeletin ónimderdi (temeki, alkogol) óndirýshiler bul raqymshylyqqa ilikpeıdi. Atalǵan qujat boıynsha salyqtyq raqymshylyq kelesi jyldyń sońyna deıin jalǵasady.
Eske sala ketsek, osy jyldyń 5 qazanynda Qazaqstan Resýpblıkasynyń Prezıdenti Nursultan Nazarbaev Qazaqstan halqyna «Qazaqstandyqtardyń ál-aýqatynyń ósýi: Tabys pen turmys sapasyn arttyrý» Joldaýyn jarııalaǵan bolatyn.
Atalmysh Joldaýda Prezıdent 2019 jyldyń 1 qańtarynan shaǵyn jáne orta bıznes úshin salyqtyq amnıstııa júrgiziletinin atap ótken edi.
«Bıznes jumysyn taza paraqtan bastaýy úshin 2019 jyldyń 1 qańtarynan shaǵyn jáne orta bıznes úshin salyqtyq amnıstııa júrgizýge kirisýdi tapsyramyn. Degenmen, barlyǵy da tegis bolyp otyrǵan joq. Birinshiden, salyqty ádil tóleıtin bıznes bar. Ol erteń «ananikin syzdyń, menikin nege syzbadyń?» deıdi. ıAǵnı, ol memleketke negizgi salyǵyn tólegen bolsa, onda ósimpuldar men aıyppuldar jaıynda sóz bolyp otyr»,-degen edi Elbasy.
