Qostanaı oblysynda 28 áıel ákim bar
QOSTANAI. QazAqparat - Arhımed Muhambetov barsha qostanaılyq názik jandylardy Halyqaralyq áıelder kúni merekesimen quttyqtady, dep habarlaıdy QazAqparat.
Búginde Qostanaı oblysynda 884 myń adam tursa, onyń 52,6%-y áıelder. Munyń syrtynda óńirdegi memlekettik qyzmetkerlerdiń 60%-y názik jandylardyń úlesinde.
«Jergilikti atqarýshy organdardaǵy 140 áıel laýazymdy jumystardy atqarýda. Onyń ishinde 6 oblystyq basqarmanyń basshysy, 9 qala-aýdan ákimderiniń orynbasarlary, 28 aýyldyń ákimi bar. Taǵy bir aıta keterligi, memlekettik áleýmettik saıasat kópbalaly jáne az qamtylǵan otbasylardy, jalǵyzbasty analardy qoldaýǵa baǵyttalǵan. Máselen, Ana men bala ortalyǵy, jańa perzenthanalar salynyp, zamanaýı qurylǵylarmen jabdyqtaldy. Prezıdenttiń bıylǵy Joldaýyn iske asyrý aıasynda 2018 jylǵy 1 shildeden bastap, múmkindigi shekteýli balalardyń analaryna arnaıy járdemaqy taǵaıyndalatyn bolady. Memleket tarapynan kórsetiletin osyndaı turaqty qamqorlyqtyń arqasynda eldegi demografııalyq jaǵdaı túzeldi», - dep atap ótti Arhımed Muhambetov.
Byltyr Qostanaıda Saıasatker áıelderdiń klýby ashyldy. Klýb quramynda 17 áıel jumys isteıdi. Olardyń basty maqsaty - memlekettik jáne qoǵamdyq-saıası jumystardaǵy áıelderdiń kadrlyq rezervin qalyptastyrý. Osy tusta oblys basshysy Qostanaıdaǵy maqtan tutar tulǵalardyń eńbekterin «jipke tizdi». 
«Esimi oblystyń tarıhyna altyn áriptermen jazylǵan jandardyń biri búgin bizdiń ortamyzda. Ol - Sotsıalıstik Eńbek Eri Alevtına Kýzmına. Bul kisi jastaıynan eńbekke aralasyp, zor tabystarǵa qol jetkizdi. Tobyl-Torǵaı óńiriniń ataǵyn alysqa jiberip, kúlli qazaqty ónerimen tánti etken Qazaqstannyń halyq aqyny Ásııa Berkenovany bilmeıtin qazaq joq. Ulttyq ónerimizdi órge súırep kele jatqan Ásııa apamyz ótken jyly «Qostanaı oblysynyń qurmetti azamaty» ataǵyna ıe boldy. Jaqynda A.Baıtursynov atyndaǵy QMÝ dotsenti Indıra Beıshova QR Prezıdenti Qorynyń syılyǵyn aldy. Oblystyń úzdik muǵalimi Janar Kópjasarqyzynada rızashylyǵymyz mol. Qostanaıdyń dańqyn asyryp, aıryqsha tabystarǵa qol jetkizip júrgen jandardy búgingi keshimizdiń qadirli qonaqtary qatarynda kórgenime qýanyshtymyn! Barlyqtaryńyzdy kóktemniń taǵy bir merekesimen quttyqtaımyn!» - dedi oblys ákimi.
Bıyl Elbasy Jarlyǵymen 3483 kópbalaly anaǵa «Altyn alqa» tósbelgisi tapsyryldy.Sondaı-aq, 4066 ana «Kúmis alqaǵa» ıe boldy. Bul tizimdi qostanaılyq 35 kópbalaly ana tolyqtyryp otyr. Búgingi sharada Arhımed Muhambetov 19 kópbalaly anany tósbelgilermen marapattady.
«Elimizde kópbalaly analarǵa degen qurmet sheksiz. Tól merekemiz qarsańynda oblys ákiminiń qolynan marapat alyp otyrmyz. Bala tárbıeleý isindegi eńbegimizdi elegen árbir janǵa analyq mahabatymyz sheksiz», - dedi «Altyn alqa» ıegeri Aıgúl Shaıahmetova.
Belgili opera ánshisi Súndet Baıǵojın osy keshke arnaıy kelip, názik jandylardy merekelerimen quttyqtady. Ary qaraı merekelik kesh kontserttik baǵdarlamaǵa ulasty.
