Qostanaı oblysynda 277 mektep shtattyq rejımde bilim beredi
Óńirde 2020-2021 oqý jylyna daıyndyq jumystary aıaqtalyp qaldy. Jalpy, oblys aýmaǵyndaǵy 489 mektepte 109,1 myń oqýshy bilim alady, 13 myń pedagog jumys isteıdi. Bıyl 11,6 myń bala birinshi synypqa qabyldanady.
«Sanıtarlyq-epıdemıologııalyq jaǵdaıdy eskere otyryp, bilim berý úderisi birneshe baǵyt boıynsha uıymdastyrylady. Jalpy kontıngenti 15 myń oqýshyny quraıtyn 277 aýyldyq shaǵyn jınaqty mektep shtattyq rejımde oqytady. 212 mektepte oqý úderisi qashyqtan uıymdastyrylady. Bastaýysh synyptarda kezekshi toptar qurylady. Al mektepaldy daıarlyq synyptary ázirge qashyqtan bilim beredi. Kezekshi toptardaǵy sabaqtar 40 mınýttan ótkiziledi, bir bólmede 15 baladan kóp otyrmaýy qajet. 1600 astam pedagog kezekshi toptarda sabaq beredi. 1-11 synyp oqýshylary oqýlyqtarmen tolyq kólemde qamtylǵan. Qashyqtan oqytýdyń sapaly jaǵdaıyn jasaý úshin jazǵy kezeńde oblys mektepterine 1,4 mlrd teńgege 6 myń kompıýter satyp alyndy. Qazaqstan Respýblıkasy Bilim jáne ǵylym mınıstrligi aǵymdaǵy jyldyń 15 qyrkúıegine deıin jalpy somasy 2,4 mlrd teńgege 15 myńnan astam dana kompıýterlik tehnıka satyp alýǵa úkimettik rezervten qosymsha qarajat bóldi», - deıdi basqarma basshysynyń mindetin atqarýshy.
Pedagogtar men oqýshylardy kompıýtermen qamtamasyz etý sharalary jalǵasýda. Qazirdiń ózinde 11 188 kompıýter berildi, taǵy 1415-i satyp alynady.
2020 jyly 26 mektepke kúrdeli jóndeý jáne 51 mektepke aǵymdaǵy jóndeý júrgizýge 8,7 mlrd teńge baǵyttalǵan. Sondaı-aq oblysta stýdentterge arnalǵan eki jataqhana salynyp jatyr. Jataqhananyń biri Qostanaı medıtsınalyq kolledjine tıesili. Oǵan 250 stýdent sııady. 700 mln teńgege salynyp jatqan jataqhananyń qurylysy jyl sońyna qaraı aıaqtalady. 500 stýdentke arnalǵan ekinshi jataqhana Qostanaı avtomobıl kóligi kolledjiniń bazasynda ornalasady. Quny 1,5 mlrd teńge bolatyn bul nysan keler jyly paıdalanýǵa berilmek.
