Qostanaı oblysynda 27 myń oqýshy kezekshi synyptarynda oqıdy
QOSTANAI. QazAqparat – Qostanaı oblysynda 108,6 myń oqýshy mektepke barady. Bul týraly oblystyq bilim basqarmasyn málim etti, dep habarlaıdy QazAqparat.
Eldegi sanıtarlyq-epıdemıologııalyq jaǵdaıdy eskere otyryp, óńirdegi bilim berý protsesi birneshe baǵyt boıynsha uıymdastyrylady. Jalpy, oblys aýmaǵynda 490 mektep jumys isteıdi. Jańa oqý jylyna 108,6 myń oqýshy barady dep kútilýde.
«Oqý protsesi sanıtarlyq shekteý sharalary qatań saqtalǵan jaǵdaıda jalǵasady. Bilim berý uıymdarynda koronavırýs ınfektsııasyn juqtyrý jaǵdaılary jáne jalpy tótenshe jaǵdaı tirkelmegen. Mektepterdegi oqytý eki aýysymda uıymdastyrylady. Aýysymdar arasynda bir jarym saǵat úzilis beriledi. Ár sabaqtan keıin nysan ishi dezınfektsııalanady. Mektepterde maska rejımi engiziledi. Jalpy 92,5 myń oqýshy úshin oqý protsesi qashyqtan uıymdastyrylady. 27 myń oqýshy kezekshi synyptarǵa bólinedi», delingen basqarma aqparatynda.
Qazir 11 012 oqýshy men 176 pedagogke kompıýter berildi. Sondaı-aq oblystyń barlyq mektebi oqý jylynyń basyna deıin joǵary jyldamdyqty ınternetke (4 Mbıt/s) qosylady. Oǵan bıýdjetten 163,5 mln teńge bólindi.
«Qashyqtyq formatqa qaramastan árbir oqýshy tegin oqýlyqpen qamtamasyz etiledi. Bıylǵy oqý materıaldaryn satyp alýǵa shamamen 1,2 mlrd teńge (1180,4 mln teńge) baǵyttalǵan. Oblys mektepterine oqýlyqtardy jetkizý 25 tamyzǵa deıin aıaqtalady», - dep habarlady basqarmanyń baspasóz qyzmeti.
Aımaqtyń bilim berý uıymdaryn beınebaqylaý júıesimen jabdyqtaý aıaqtaldy. Oblystyq bıýdjetten 187 mln teńge baǵyttalyp, 460 mektepke kamera ornatyldy.
