Qostanaı oblysynda 265 mektep qalypty jaǵdaıda bilim beredi
QOSTANAI.QazAqparat – Qostanaı oblysynyń ákimi Arhımed Muhambetov óńirdiń 2020-2021 oqý jylyna daıyndyǵy týraly jýrnalıstermen brıfıng ótkizdi, dep habarlaıdy QazAqparat.
Oblys basshysynyń aıtýynsha, eldegi sanıtarlyq-epıdemıologııalyq jaǵdaıdy eskere otyryp, bilim berý protsesi birneshe baǵyttar boıynsha uıymdastyrylatyn bolady.
«Óńirde 490 mektep jumys isteıdi. Jańa oqý jylyna 108,6 myń oqýshy men 13 myń pedagog daıyn. Birinshi synypqa boljam boıynsha 12 myń bala qabyldanady. Barlyq mektepterde, aýyldyq shaǵyn jınaqtalǵan mektepterdi qospaǵanda, oqý jylyn qashyqtan bastaý josparlanǵan. Bul rette ótken oqý jylynyń tórtinshi toqsanynyń tájirıbesine júginemiz. 265 mektep sanıtarlyq-epıdemıologııalyq qaýipsizdik sharalaryn kúsheıte otyryp, shtattyq rejımde oqytatyn bolady. Barlyǵy 16 myńnan astam oqýshy qalypty jaǵdaıda sabaqqa barady dep kútilýde. Shtattyq rejımde jumys isteıtin mektepterdiń eń kóbi Qostanaı qalasy men Meńdiqara aýdanynda. Bilim berý uıymdarynda koronavırýs ınfektsııasyn juqtyrý jaǵdaılary tirkelgen joq. Sonda da oqý protsesi sanıtarlyq shekteý sharalary qatań saqtalǵan jaǵdaıda jalǵasatynyn eske salamyn», - dedi Arhımed Muhambetov.
Mektepterdegi oqytý eki aýysymda ótedi. Úzilis kezinde ǵımarat ishin jeldetý rejımi uıymdastyrylady. Ár sabaqtan keıin synyp ishin dezınfektsııalaý jumystary júrgiziledi. Mektepterde maska rejımi engiziledi jáne medıtsınalyq baqylaý kúsheıtilmek.
