Qostanaı oblysynda 24 bóget sý tasqynyna daıyn emes
QOSTANAI. QazAqparat - Qostanaı oblysynyń ákimdiginde ótken kezekti apparat májilisinde kóktemgi sý tasqynyna daıyndyq barysy pysyqtaldy, dep habarlaıdy QazAqparat tilshisi.
Oblys ákiminiń orynbasary Sergeı Karplıýktiń aıtýynsha, óńirdegi sý tasqynyna qarsy sharalardyń júrgizilý barysy men sý nysandarynyń kóktemgi kezeńge ázirligi turaqty baqylaýda.
«Qazirgi ýaqytta eki myńnan astam kúsh qurylymdary men 826 tehnıka, 83 júzý quraly, 245 sý sorǵysh tehnıkasy, jıyrma myń tonnadam astam ınertti materıal daıyn tur. Munyń syrtynda muz jarý jumystaryn júrgizý úshin de tıisti mekmelermen kelisimshart jasaldy. Sý tasqynynyń aldyn alý úshin oblystyq bıýdjetten 455 mln teńge qarastyrylǵan», - dedi Karplıýk.
Oblystaǵy gıdrotehnıkalyq qurylymdardyń jáne sý qoımalarynyń tasqyn sýǵa daıyndyǵy týraly Tobyl-Torǵaı basseıni ınspektsııasynyń basshysy Gúlshat Ospanbekova baıandady. Onyń sózinshe, sý resýrstary ınspektsııasynyń mamandary óńirdegi gıdrotehnıkalyq qurylymdardyń jaı-kúıin tekserip shyqty.
«Qostanaı oblysy terrıtorııasynda 103 gıdrotehnıkalyq qurylym tirkelgen. Onyń ishindegi 24 bóget tasqyn sýǵa daıyn bolmaı shyqty. Atap aıtqanda, Dokýchaev, Qarabóget, Qyzyl-aryq, Jyryqbóget, Joǵarǵy Shortandy, Shynsaı sııaqty bógetterdiń jaǵdaıy máz emes. Byltyr sý resýrstary ınspektsııasynyń mamandary atalǵan nysandardy retke keltirý úshin jergilikti atqarýshy organdarǵa aqparattyq hat jiberdi. Aldaǵy naýryz aıynda arnaıy komıssııa bógetterdiń jaı-kúıin taǵy bir tekserip shyǵady», - dedi Gúlshat Ospanbekova.
Jıynda belgili bolǵandaı, oblystaǵy sý qoımalarynyń 68 paıyzy tolyp tur. Búginde qoımalardaǵy 449 mln tekshe metr bos oryn sý qabyldaýǵa ázir.
Oblys ákimi Arhımed Muhambetov tasqynǵa qarsy daıyndyqty kún tártibinen túsirmeý kerektigin aıtty.
«Kóktemgi sý tasqynyna baılanysty jaǵdaıdy únemi nazarda ustaý qajet. Sondyqtan árbir qala-aýdan ákimderine tasqynǵa qarsy sharalar týraly monıtorıng júrgizýdi tapsyramyn. Keıde qardyń erýi sınoptıkter boljaǵan merzimge sáıkes kelmeı, kúrt ózgeretin jaıttar kezdesip jatady. Sol úshin daıyndyq jumystaryn tyńǵylyqty júrgizý kerek. Tasqynǵa daıyn emes bógetterdi tez arada qalypqa keltirińizder» - dedi oblys ákimi.
