Qostanaı oblysynda 2336 úıdi sý basýy múmkin
QOSTANAI. QazAqparat - Bıyl Qostanaı oblysynda tótenshe jaǵdaılardyń aldyn alý jáne joıý úshin jedel shtab quryldy, habarlaıdy QazAqparat
Oblystyq TJD bastyǵy Talǵat Kákimov tasqyn sýǵa qarsy jaǵdaıdy tolyq baqylaýda ustaý úshin jedel shtab qurylǵanyn aıtty. Arnaıy top 24 naýryzdan bastap iske kiristi. Qyzmetkerler aldymen Arqalyq qalasy, Áýlıekól, Naýyrzym, Qarasý, Qostanaı, Sarykól, Uzynkól jáne Mendiqara aýdandaryna jiberiledi. Buǵan qosa tasqyny qaýpi bar gıdrotehnıkalyq qurylystardy baqylaý boıynsha kezekshilik uıymdastyryldy.
«Oblys aýmaǵynda 100 eldi mekendi nemese 8277 turǵyny bar 2336 úıdi sý basýy múmkin. Sondaı-aq, 46 respýblıkalyq, 50 oblystyq mańyzǵa ıe avtokólik joldaryn sý shaıyp ketý qaýpi bar. Elektr taratý jelisiniń 17 ýchaskesi de qaýip aldynda tur. Jergilikti atqarýshy organdarmen birlese sý basýy múmkin alqaptardaǵy osal aımaqtar anyqtalyp, turaqty baqylaýǵa alyndy. Oblystyq densaýlyq saqtaý basqarmasy qaýipti eldi mekenderde turatyn júkti áıelderdi esepke aldy», - dedi departament basshysy.
Búginde sý basý aımaǵynan evakýatsııalanǵan azamattardy ýaqytsha ornalastyrýǵa 152 nysan daıyndap. Onyń ishinde jataqhana, qonaq úı, bilim nysandary bar. Odan basqa 3 myń 248 kereýet, 6 myń 67 tósek oryn jıyntyǵy jáne 5 myń 798 tonna azyq-túlik qarastyrylǵan. Tasqyn sýǵa qarsy qımylǵa 2474 adam jáne 615 tehnıka tartylady. Sý basýy múmkin aımaqtarda 488 ınjenerlik tehnıka, 221 júk kóligi, 137 avtobýs, 83 júzý quraly, 245 sýdy sorǵytyp alatyn arnaıy tehnıka daıyn tur.
«20 naýryzdaǵy málimet boıynsha oblystyń eldi mekenderinen 614,6 myń kýb metr qar shyǵaryldy. 10 sáýirge deıin 15 ýchaskede muz jarý jumystary josparlandy. Sý tasqyny jaǵdaıyn baǵalaý úshin 28 naýryzda oblystyń ońtústik aımaqtaryn ushaqpen qarap shyǵamyz. Sý tasqyny jaǵdaıy týraly aqparattarmen almasý úshin Chelıabi jáne Orynbor oblystarymen baılanys ornattyq», - dedi T.Kákimov.
«Qazgıdromet» oblystyq fılıalynyń dırektory Larısa Kýzmınanyń málimetinshe, oblysta qystaı jaýǵan qardaǵy sý qory byltyrǵynyń 40% ǵana quraıdy. Al sý qoımalaryndaǵy sý onyń 68% toltyryp tur, 449 mln tekshe metr sý sııatyn oryn bar.
