Qostanaı oblysynda 232 mektep qashyqtan oqytýǵa kóshedi
QOSTANAI. QazAqparat – Qostanaı oblysynda 232 mektep qashyqtan oqytýǵa kóshedi. Bul týraly búgin qala jáne aýdan ákimderiniń selektor keńesinde aıtyldy, dep habarlaıdy QazAqparat.
Úkimettiń keńeıtilgen otyrysynda Memleket basshysy Qasym-Jomart Toqaev Úkimetke, Bilim jáne ǵylym mınıstrligine, ákimdikterge jańa oqý jylyn uıymdastyrý boıynsha birneshe tapsyrma bergen bolatyn. Qazir osy tapsyrmalar aıasynda jumys qarqyndy júrip jatyr. Bilim jáne ǵylym mınıstri Ashat Aımaǵambetov 2020-2021 oqý jylynyń 1 toqsanynda bilim berý protsesin uıymdastyrýdyń negizgi tásilderin belgiledi. Jańa oqý jylynda qalalyq jerdegi barlyq mektepter qashyqtan oqytýdy bastaıdy.
«Ázirge qashyqtan oqytý oqý jylynyń bastalýyna arnalǵan sheshim ǵana, odan ári sanıtarlyq-epıdemıologııalyq jaǵdaıdyń turaqtylyǵyna baılanysty mektepter men kolledjder shtattyq formatqa birtindep ótedi. Oblystyń bilim berý salasynyń jańa maýsymnyń bastalýyna daıyn. Jazda 1,4 mlrd teńgege 6 myń kompıýter satyp alyndy. Bul bilim berý uıymdarynyń kompıýter parkin 50%-ǵa jańartýǵa múmkindik berdi. Sondaı-aq, búgingi tańda oblysta 492 mekteptiń 480-i joǵary jyldamdyqty ınternetke qosylǵan (4 Mbıt/s) «, - dedi oblystyq bilim basqarmasynyń basshysy Vasılıı Tsymbalıýk.
Onyń aıtýynsha, qala, aýdan ákimderi mektepterdi dezınfektsııalaý tonneli, kvarts shamy jáne sanıtarlarmen qamtýy tıis. Sondaı-aq oqýshy men pedagogti maskamen jáne qolǵappen qamtamasyz etý jónindegi sharalardy qabyldaýy qajet.
«Óńirde 95,5 myń oqýshysy bar 232 mektep oqý protsesin qashyqtan uıymdastyrdy. Budan bólek, 1-5 synyp aralyǵynda kezekshi synyptardyń jumys isteýi josparlanady. Aldymen ata-analardyń kelisimin alamyz jáne árbir mektepte tıisti jaǵdaı jasalýy tıis», - deıdi Vasılıı Tsymbalıýk.
Basqarma basshysynyń aıtýynsha, mýzyka, kórkem eńbek, dene shynyqtyrý, dúnıetaný, ózin-ózi taný sııaqty pánder qashyqtan ótkiziledi. Mundaı oqytý formaty mektepterde indet juqtyrý qaýpin azaıtýǵa múmkindik beredi.
Oblystyń 34 tehnıkalyq jáne kásiptik bilim berý uıymy jańa oqý jylyn qashyqtan oqytý rejıminde bastaıdy. Barlyq kolledjde buǵan tıisti jaǵdaı jasalǵan.
