Qostanaı oblysynda 2000 tonna azyq-túlik qory daıyndaldy

QOSTANAI. QazAqparat – Qostanaı oblysynyń Óńirlik turaqtandyrý qory birneshe aıǵa jetetin azyq-túlik qoryn daıyndady, dep habarlaıdy QazAqparat tilshisi.

Óńirlik turaqtandyrý qorynyń ókili Ǵızat Qalenovtyń aıtýynsha, áleýmettik mańyzy bar taýarlardyń qunyn turaqty ustaý oblysta keshendi sharalar júrgizilýde. Jalpy, oblystyń turaqtandyrý qorynda halyq kúndelikti tutynatyn, áleýmettik mańyzǵa ıe 2 myń tonna azyq-túlik qory daıyndaldy.

«Onyń ishinde 181 tonna qant, 460 tonna jumyrtqa, 19 tonna kúrish, 280 tonna makaron ónimderi, 100 tonna kartop, 420 tonna sábiz, 294 tonna jýa, jáne basqa da eń qajetti taýar qory saqtaýly. Bul oblys qajettiligin birneshe aıǵa qamtýǵa múmkindik beredi. Kókónis ónimderiniń jetkilikti kólemi satyp alyndy. Sondyqtan ónimniń osy túrinen tapshylyq bolmaıdy», - deıdi Ǵızat Qalenov.

Jalpy áleýmettik mańyzdy dep tanylǵan taýarlardyń basym bóligi Qostanaı oblysynda óndiriledi. Qajetti ónim kólemi únemi tolyqtyrylyp otyrady. Turaqtandyrý qory «Tobyl» áleýmettik-kásipkerlik korporatsııasymen kelisimshart aıasynda jyl aıaǵyna deıin 5200 tonna un, 20 tonna qaraqumyq jarmasyn satyp almaq. Bul maqsatqa 620 mln teńge jumsalady.

Turaqtandyrý qorynyń mamandary dúkenderdi aralap, azyq-túliktiń kólemi men baǵasyna baqylaý júrgizip otyrady.

Aıta keteıik, osy jyldyń 17 qazanynda Qostanaı qalasynda kúzdiń alǵashqy aýyl sharýashylyǵy jármeńkesi ótedi. Onda usynylǵan ónimderdiń baǵasy naryqtaǵydan 15-20 paıyzǵa tómen bolmaq.