Qostanaı oblysynda 2000 adam bıznes negizderin úırenedi
QOSTANAI. QazAqparat - Qostanaıda 1000-nan astam adam bıznes kýrstaryn oqyp shyqty. Bul týraly Arqalyq qalasynda ótken jıynda Qostanaı oblysy ákiminiń orynbasary Meıirjan Myrzalıev málim etti, dep habarlaıdy QazAqparat.
Shaǵyn jáne orta bıznes - el ekonomıkasynyń kúretamyry. Bul sala Qostanaı oblysynda endi-endi qarqyn alyp keledi. Oblys ákiminiń orynbasary Meıirjan Myrzalıevtiń sózinshe, bıyl 1177 adam bıznes kýrstarǵa qatysty. Olardyń 693-i óz bıznes-jobalaryn qorǵady.
«Ótken jyly jobaǵa oblystyń ońtústik óńirleri qatysqan joq. Oqý tek Áýlıekól, Qarabalyq, Qarasý, Qostanaı, Meńdiqara jáne Fedorov aýdandarynda ótkizildi. Bıyl barlyq aýdan men qalalarda oqytý júrgizilýde. Jalpy jyl sońyna deıin 2 000 adamdy oqytý josparda bar. Jyl basynan beri 693 bıznes oqýyn bitirýshiniń 304 jobasy qarjylandyryldy. Bul maqsatta 782,8 mln teńge jumsaldy», - dedi Meıirjan Myrzalıev.
Qostanaılyqtardyń kóbi «Bastaý-Bıznes» jobasy boıynsha oqýǵa túsedi. Onyń tıimdiligi - shaǵyn nesıe alyp, bıznes júrgizý negizderin úıretedi. Osy bastama aıasynda Qostanaı oblysy boıynsha 454 kásipkerlik sýbektisi ashylmaq. Búginde sol jospardyń 63 paıyzy oryndalǵan.
Aıta keteıik, «Bastaý-Bıznes» kýrsyna kez kelgen azamat qatysa alady. «Basty talap - kásipkerlikpen aınalysýǵa degen qulshynys qana» deıdi mamandar. Bıznes jobalardyń jartysy aýyl sharýashylyǵyn damytýǵa negizdelgen. Qalǵany qyzmet kórsetý, tasymaldaý men qoǵamdyq tamaqtandyrý qyzmetine arnalǵan. Endi dáris alǵan ár azamat aýyl sharýashylyǵyn qarjylaı qoldaý qory nemese basqa da nesıe uıymdarynyń qoldaýyna ıe bola alady. Sharttary da tıimdi.
Meıirjan Myrzalıev aıtqandaı, «Qos Qoldaý» shaǵyn jáne orta kásipkerlik sýbektilerin qarjylandyrý boıynsha «Damý» kásipkerlikti damytý qory» aktsıonerlik qoǵamy qarjy bóledi. Búginde kásipkerlerdi daıarlaý jáne kásip nysandaryn ashýǵa 1 mlrd teńge bólindi. Onyń 500 mln teńgesi oblystyq bıýdjetten qarastyryldy.
