Qostanaı oblysynda 200-ge jýyq aýyl derbes bıýdjetke kóshedi

QOSTANAI. QazAqparat – Qostanaı oblysynyń Qarasý aýdanynda «Aýyldyq okrýgterdi ońtaılandyrýdan birinshi basshylardyń jaýapkershiligine deıin» taqyrybynda keńeıtilgen dóńgelek ústel ótti, dep habarlaıdy QazAqparat.

Jıynǵa oblys ákiminiń orynbasary Erlan Spanov pen memlekettik qyzmet isteri departamentiniń basshysy Salaýat Múksimov, sondaı-aq barlyq aýdan ákimderiniń orynbasarlary men aýyldyq okrýgter ákimderi qatysty. Erlan Spanov QR Prezıdenti Qasym-Jomart Toqaevtyń Joldaýynda kórsetilgen baǵyttarǵa toqtaldy. Joldaýda aıtylǵan ilkimdi jobalardyń biri – «Tabysty aımaq - myqty el». Bul tujyrymdama «100 naqty qadam: Barlyǵyna arnalǵan qazirgi zamanǵy memleket» ulttyq baǵdarlamasynyń jalǵasy sanalady.

Al memlekettik qyzmet isteri departamentiniń basshysy Salaýat Múksimovtiń sózinshe, qoıylǵan mindetterdi iske asyrý úshin jergilikti ózin-ózi basqarýdyń derbes bıýdjetin engizýdiń mańyzy zor.

«Qazirgi ýaqytta oblysta aýyldar men aýyldyq okrýgterdi ońtaılandyrý jumystary júrgizilýde. Bul jumys ákimshilik shyǵyndardy azaıtýǵa ǵana emes, derbes bıýdjetti tıimdi engizýge de yqpal etetin bolady. Joldaýda qoıylǵan mindetter belgilengen merzimde múltiksiz oryndalýy tıis. Olardy sapaly iske asyrýǵa daıyn bolý kereksizder!» - dedi S.Múksimov aýyl ákimderine qarata.
Qostanaıda 2018 jyldyń qańtar aıynan bastap 2 myń adamnan astam halqy bar 45 aýyl men aýyldyq eldi mekenderde derbes bıýdjetter engizildi. Qalǵan 195 aýylda derbes bıýdjetter 2020 jyldan bastap jumys isteı bastaıdy. Alaıda, qazir aýdandyq deńgeıde aýyldyq bıýdjetterdiń kórsetkishterin qalyptastyrý júrgizilýde.
Aýyldyq okrýgterdi ońtaılandyrý olardyń qyzmet tıimdiligin arttyrý maqsatynda bıýdjettiń derbes deńgeıine kóshýdi alǵashqy bolyp Qarasý aýdanynyń ákimdigi bastady.
«Bul qaıta uıymdastyrý aýyldyq okrýgterdiń sanyn 19-dan 13-ke deıin azaıtýǵa, kadrlardyń sapalyq quramyn jaqsartýǵa, aýyl jáne aýyldyq okrýgterdiń mamandary arasyndaǵy júktemeni sáıkestendirýge múmkindik beredi. Sondaı-aq 2020 jyldyń 1 qańtarynan bastap aýyldarda bıýdjettiń 4 deńgeıi engizilýine baılanysty barlyq memlekettik qyzmetshilerge qyzmettik mindetterin sapaly oryndaýǵa, jumys ýaqytyn tıimdi paıdalanýǵa septigin tıgizedi», - dep atap ótti Qarasý aýdanynyń ákimi Vıktor Ionenko.
Oblys ákiminiń orynbasary Erlan Spanovtyń aıtýynsha, mundaı tájirıbeni oblystyń basqa óńirlerinde qoldaný josparlanyp otyr.