Qostanaı oblysynda 20 shaqty avtobýs júrgizýshisi jumysqa shyǵýdan bas tartty
Búgin Qostanaı qalasynyń turǵyndary birneshe qoǵamdyq kóliktiń aıaldamalarǵa kelmegenin aıtyp, áleýmettik jelilerde habar taratty. Bul máseleniń mán-jaıyn túsindirý úshin Qostanaı qalasy ákiminiń orynbasary Ánýarbek Kasımov brıfıng ótkizdi.
Onyń aıtýynsha, ákimdik qoǵamdyq kólikterge valıdator ornatylyp, 2021 jyldyń 9 aqpanynan bastap avtobýstar jolaqy qabyldaýdyń jańa tártibine tegis kóshetinin málimdegen. Alaıda, keıbir avtobýs júrgizýshileri jolaqy tóleminiń jańa júıesine narazylyq bildirdi. Júrgizýshiler ózderine laıyqty eńbekaqy taǵaıyndap, jumys istemeı qalǵan valıdator úshin jaýapkershilikten bosatýdy talap etedi.
«Ákimdik ókilderi keshe saǵat 12:00-den 20:00-ge deıin kásiporyndarǵa baryp, júrgizýshilermen keńesti. Jyl basynda valıdatorlardyń engiziletinin aıtyp, kelisimin aldyq. Biraq búgin narazylyq tanytqan «Qostanaıavtotrans» seriktestigine tıesili № 2, 7, 13 marshrýttary jolǵa shyqpaı qaldy. Jumysqa shyǵýdan bas tartqan 20-ǵa jýyq avtobýstyń barlyǵy osy seriktestikke tıesili. Qalǵan tasymaldaýshylar shart talaptaryn buzǵan joq, keste boıynsha jumysqa shyqty. Árıne, júrgizýshilerdiń birqatar suraǵy bar, olar tólem júıesin synǵa alyp otyr. Ákimdik tenderdi utyp alǵan zańdy tulǵalarmen jumys isteıdi. Kelisimshartqa sáıkes, avtobýstar mindetti túrde jolǵa shyǵýy tıis. Eger keleńsiz jaǵdaı oryn alatyn bolsa, qolymyzda konkýrstyq qujattar men jolaýshylar tasymaly týraly kelisimshart bar. Máseleniń bárin zań sheńberinde sheshemiz», - deıdi ákim orynbasary.
Belgili bolǵandaı, búginnen bastap Qostanaı qalasynda jolaýshy tasymaldaıtyn № 22 qoǵamdyq kólik qyzmetin toqtatty.
