Qostanaı oblysynda 2 myń adam jumyssyz júr
QOSTANAI. QazAqparat - Qostanaıda jyl basynan beri 6333 adam turaqty jáne ýaqytsha jumysqa ornalasty, taǵy 2 myńnan astam adam eńbekke muqtaj. Bul týraly oblys ákimdiginde ótken keńeıtilgen apparat májilisinde oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnár Ábenova aıtty, dep habarlaıdy QazAqparat tilshisi.
Jyl basynan beri oblysta 9,7 myń adam jumyspen qamtý mekemeleriniń kómegine júgingen. Olardyń 91% - jumysqa turýǵa ótinish bildirýshiler.
«2017-2021 jyldarǵa arnalǵan Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasy óńirde sátti júzege asyp jatyr. Baǵdarlamaǵa qatysýshylardyń deni - áıelder. Onyń ishinde kópbalaly analar da bar. Búgingi tańda 1617 adam qysqa merzimdi kýrstarda bilim alýda. Olar kýrs aıaqtalysymen jumysqa ornalastyrylatyn bolady», - dedi G.Ábenova.
«Eńbek» baǵdarlamasynyń úshinshi baǵyty - halyqty turaqty jumysqa ornalastyrý. Jyl basynan beri 6333 adam turaqty jáne ýaqytsha jumys oryndaryna jiberildi. Máselen, eńbekke tartylǵan 6 myń adamnyń 52,9% turaqty jumyspen qamtyldy. Alaıda, oblysta 2006 adam jumyssyz júr. Olardyń 339-y kópbalaly otbasylar sanatyna jatady.
Sondaı-aq atap ótilgendeı, «Eńbek» baǵdarlamasy boıynsha bıylǵa 7,2 mlrd teńge bólingen bolsa, jyl basynan bergi tórt aıda onyń 1,2 mlrd teńgesi ıgerildi.
«Jumyssyzdyqty azaıtý úshin ótinish bildirgen jandardy qoldan kelgenshe turaqty jumysqa ornalastyrǵan jón. Ásirese, Arqalyq qalasynda, Jankeldın, Naýryzym, Taran aýdandary tárizdi birqatar óńirde buǵan basa nazar aýdarý kerek», - dedi ol.
Eńbek resýrstaryn jetildirý maqsatynda elimizdiń ońtústik, batys óńirlerinen qonys aýdarýshylardy qabyldaý kvotasy 35,5%, oralmandardy qabyldaý kvotasy 86,8% oryndaldy. Qostanaı oblysyna kóship kelýshilerdiń 105-i jumysqa ornalastyryldy. Úsh adam qaıta daıarlaý kýrstarynan jáne jeti adam «Bastaý bıznes» jobasy boıynsha oqyp jatyr. 272 oralmannyń 188-i eńbekke aralassa, 7 adam qaıta daıarlaý kýrstarynda dáris alyp júr.
Oblys ákimi Arhımed Muhambetov ózge oblystardan kóship kelýshilerdi, oralmandardy eńbekke aralastyrý máselesi aýdandar men qalalarda naqty kórinis tabýy qajet dedi. Bul rette, óńir basshysy aýdan, qala ákimderine tıisti tapsyrmalar júktedi.
