Qostanaı oblysynda 2,5 mln sharshy metr turǵyn úı salynady – Arhımed Muhambetov
QOSTANAI. QazAqparat – Qostanaı qalasynyń «ıÝbıleınyı» shaǵyn aýdanynda turǵyn úı qurylysy jalǵasady. Bul týraly oblys ákimi Arhımed Muhambetov áleýmettik jelide jazdy, dep habarlaıdy QazAqparat.
Oblys basshysy merdigerlik uıymdardyń basshylarymen kezdesý ótkizdi. Jalpy, 2020-2025 jyldar aralyǵynda munda aýdany 2,5 mln sharshy metrden astam kóppáterli turǵyn úı salynady.
«Kezdesý barysynda oblys ortalyǵyndaǵy shaǵyn aýdandar qurylysynyń jospary men barysy talqylandy. Sondaı-aq, merdigerlerge koronavırýs pandemııasy kezinde eńbek qaýipsizdigi jáne eńbekti qorǵaý boıynsha sanıtarlyq normalardy saqtaýdy kúsheıtýdi usyndym. «Bereke» shaǵyn aýdanyndaǵy «Juldyz» kesheni úıleriniń qurylys barysyn qarap shyqtym», - dep jazdy aımaq ákimi.
Arhımed Muhambetov merdiger uıymdardyń basshylaryna josparlanǵan barlyq jumysty sapaly jáne ýaqytyly júrgizýdi tapsyrdy.
Aıta keteıik, Qostanaı aýdanynyń Zarechnyı aýylyndaǵy «Severnyı» shaǵyn aýdanynyń qurylysy aıaqtalyp keledi. 37 gektar alqapqa biryńǵaı sáýlettik stılde 279 jeke turǵyn úı salyndy. Byltyrǵy jyldyń basynan beri oblysta 658 páter berildi, bul respýblıka boıynsha 4-oryn. Nátıjesinde halyqtyń turǵyn úımen qamtamasyz etilýi 21,8%-ǵa jetti
