Qostanaı oblysynda 18 adam qar qursaýynan shyǵaryldy
QOSTANAI. QazAqparat – Qostanaı oblysynda birneshe avtokólik qar qursaýynan shyǵaryldy, dep habarlaıdy QazAqparat oblystyq TJD baspasóz qyzmetine silteme jasap.
Qostanaı oblysynda qar qursaýyndaǵy qutqarý jumystary jalǵasýda. Jyl basynan beri óńir qutqarýshylary júzdegen adamdy aman alyp shyqty.
«Keshe túnde Arqalyq-Torǵaı tas jolynyń 30 jáne 60 shaqyrymynda jolaýshylary bar kólikter qarda turyp qaldy. Qutqarý jumystaryn júrgizý úshin ótimdiligi joǵary «Nıva Marsh-BRONTO» tehnıkasymen Arqalyq qalasynyń qutqarý bólimsheleriniń toby jiberildi. Jumys barysynda tas joldyń 32 shaqyrymynda 6 mashına qar qursaýynan shyǵaryldy, 15 jolaýshy qutqaryldy. Atalmysh joldyń 60-shy shaqyrymynda qutqarýshylar 3 adamdy evakýatsııalady», - dedi vedomstvonyń baspasóz hatshysy Ýálıhan Dosanov.
Zardap shekken adamdar Arqalyq qalasyna jetkizildi.
