Qostanaı oblysynda 17 myńǵa jýyq adam jumyspen qamtylady

QOSTANAI. QazAqparat – Bıyl Qostanaı oblysyna «Eńbek» baǵdarlamasyn júzege asyrý úshin 9 mlrd teńge bólindi. Bul qarjyǵa 17 myńǵa jýyq adamdy eńbekke tartý josparlanyp otyr. Oblys ákimdiginde ótken jıynda jumyspen qamtý máselesi talqylandy, dep habarlaıdy QazAqparat ákimdiktiń baspasóz qyzmetine silteme jasap.

Bıyl óńirde kadr daıarlaý jáne uzaq merzimdi oqýǵa 1,5 myńǵa jýyq adam jiberilmek. Biraq ázirge qandaı mamandyqtar tizimi jasalǵan joq. Sonymen qatar «Bıznes-Bastaý» jobasy boıynsha kásipkerlik negizderin 1400 jas maman oqıdy.

«Osy jyly kásipkerlerdi shaǵyn nesıeleýge 1,4 mlrd teńge qarastyrylǵan. Bul qarajatqa aýyldyq jerler úshin 1 mlrd teńgege 226 mıkrokredıt beriledi. Qarjy aýdarý sáýir aıyna belgilengen, qalalarda jalpy somasy 416,1 mln teńge bolatyn 47 shaǵyn nesıe berý josparlanǵan. Respýblıkalyq «Jas maman» jobasyn iske asyrýǵa 2,1 mlrd teńge baǵyttalady. Bul qarjyǵa oblystyń 7 kolledji zamanaýı qurylǵylarmen jabdyqtalady. 16 zerthana, 8 sheberhana jáne jańa modıfıkatsııaly 2 kabınet iske qosylady», – deıdi Jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenova.

2021 jyly «Eńbek» baǵdarlamasy aıasynda jastar tájirıbesi jáne qoǵamdyq jumystarǵa 17 myń adamdy ornalastyrý josparlanyp otyr. Al eńbek resýrstary mobıldiligi baǵyty boıynsha ońtústikten 800 qonys aýdarýshy kelýi múmkin. Olardy turaqty jumyspen qamtý jáne jańa mamandyqtarǵa oqytýǵa jiberý kózdelgen.