Qostanaı oblysynda 17 adam qyzylsha juqtyrdy
QOSTANAI. QazAqparat - Búginde Qostanaı oblysynda qyzylsha aýrýynyń 17 jaǵdaıy tirkelgen, onyń 12-si zerthana mamandarymen rastalǵan, dep habarlaıdy QazAqparat.
Qostanaı oblysy qoǵamdyq densaýlyq saqtaý departamentiniń ınfektsııalyq jáne parazıttik aýrýlardy epıdemıologııalyq qadaǵalaý bóliminiń basshysy Gúlim Dosymova aıtqandaı, qyzylsha aýrýyn juqtyrǵandar óńirdiń 4 aýdanynda tirkeldi.
«2018 jylǵy 25 qańtardaǵy jaǵdaı boıynsha, Qostanaı oblysynda 17 adam qyzylshamen aýyrǵan. Onyń ishinde 12 jaǵdaıdy zerthana mamandary tolyqtaı rastady. Taǵy 2 adam epıdemıologııalyq jaǵdaılarǵa baılanysty, al 3 adam jumys barysynda juqtyrǵan. Qyzylsha aýrýy Qostanaı qalasy men Qostanaı, Denısov jáne Jitiqara aýdandarynda tirkeldi», - dedi G.Dosymova.
Belgili bolǵandaı, eki jasqa deıingi 10 bala qyzylsha juqtyryp alǵan. Taǵy bir aıta keterligi, aýrý juqtyrǵan 11 adam áli ekpe jasatpaǵan. Al eki adam eki márte egilse, tórt adam vaktsınatsııa týraly málimet almaǵan.
«Epıdemıologııalyq tekserý kezinde qyzylshamen aýyrǵan 6 adam Astana men Aqtóbe qalalarynda turǵany anyqtaldy. Atalǵan aýmaqtarda epıdemııaǵa qarsy is-sharalar júrgizilip jatyr, aýrý juqtyrǵandarmen baılanysta bolǵan adamdarǵa baqylaý ornatyldy. Barlyǵy 231 adam qaperge alyndy», - dedi G. Dosymova.
Buǵan deıin habarlaǵanymyzdaı, Qostanaıda jyl basynan beri mektep jasyna deıingi balalar arasynda qyzylsha aýrýynyń alty oqıǵasy anyqtaldy.
