QOSTANAI. QazAqparat – Qostanaı oblysynda 167 aýylda bilim berý mekemesi joq. Bul aqparatty óńirlik kommýnıkatsııa qyzmetinde oblystyq bilim salasynda sapany qamtamasyz etý departamentiniń basshysy Oral Qappasov málim etti, dep habarlaıdy QazAqparat.
Oblysta mektepke deıingi uıymdarda 17 myń bala kezekte tur. Negizi, óńirde mektepke deıingi júıeni damytýdyń 2025 jylǵa deıingi jospary ázirlengen-di. Oǵan sáıkes 50 balabaqsha kezeń-kezeńimen jańǵyrtýdan ótedi. Bul jyl saıyn 5 myńǵa jýyq balany qosymsha qamtýǵa jáne memlekettik baǵdarlamada belgilengen kórsetkishke qol jetkizýge múmkindik beredi.
«Bıylǵy derek boıynsha 167 aýyldyq eldi mekende bilim berý uıymdary joq. Bul aýyldarda mektep jasyndaǵy 1538 bala turady. Olar kórshi aýyldardaǵy mektepterge arnaıy bólingen avtobýspen qatynap oqıdy. Tehnıka parki jańartýdy qajet etedi. Osy maqsatta 2022 jylǵa deıin 30 avtobýs satyp alý josparda bar», - dedi Oral Qappasov.
Qostanaı oblysynda 47 mektep kúrdeli jóndeýdi kútip tur. Oǵan jalpy somasy 14 mlrd teńge qarajat kerek.
«Osy jyly 3 mlrd teńgege 15 mektepti jóndeýden ótkizý josparlanyp otyr, 3 mektep apatty jaǵdaıda. Aldaǵy ýaqytta bul ǵımarattardyń ornyna árqaısysy 320 oryndyq 3 jańa mektep salynady. Byltyr Áýlıekól aýdanyna qarasty Amanqaraǵaı aýylynda apatty jaǵdaıda turǵan eski mekteptiń ornyna jańa mektep salyna bastaǵan. Onyń qurylysy bıyl shilde aıynda aıaqtalmaq. Qalǵan eki mektep 2023 jylǵa deıin salynyp, paıdalanýǵa beriledi», - dedi basqarma basshysy.
